༄༅། །ཉི་སྡེ་རབ་བརྟན་གླིང་དགོན་ནི། ༸དཔལ་རྒྱལ་དབང་ཀརྨ་པ་སྐུ་ཕྲེང་ལྔ་པ་དེ་བཞིན་གཤེགས་པ་མཆོག་གིས་བོད་ལྷོ་བྲག་ཏུ་ཕྱག་བཏབ་པའི་དགོན་པ་ཞིག་ཡིན། བྱེས་སུ་ཉི་སྡེ་རབ་བརྟན་དགོན་གྱི་བླ་གྲྭ་དང་ཕ་མ་རྒན་རབས་པ་རྣམས་ཀྱིས་ཕྱི་ལོ་༡༩༥༩ལོར་འབྲུག་ཡུལ་འཇིགས་མེད་ནང་དུ་སྒྲུབ་བརྒྱུད་ཀརྨ་ཀཾ་ཚང་གི་དགོན་པ་འདི་ཉིད་གསར་བཞེངས་གནང་། དེང་སྐབས་དགེ་འདུན་པ་ཞལ་གྲངས་༦༧བཞུགས་ཤིང་།བླ་མ་ཚེ་དབང་རབ་བརྟན་ལགས་ཀྱི་གཟིགས་རྟོག་འོག་གྲྭ་གཞོན་རྣམས་ལ་བྱིས་པ་དག་ཡིག་དང་།རྒྱལ་སྲས་ལག་ལེན་སོ་བདུན་མ།ལེགས་བཤད་ལྗོན་དབང་དང་།གྲྭ་རྒན་པ་རྣམས་ལ་རང་ལུགས་ཀརྨ་ཀམ་ཚང་གི་ཕྱག་བཞེས་ལྟར་ཆོ་ག་ཕྱག་ལེན་སོགས་སློབ་སྦྱོང་གནང་གི་ཡོད།། །།

༄༅། །དཔལ་ཐུབ་བསྟན་ངེས་དོན་བཤད་སྒྲུབ་དར་རྒྱས་གླིང་ནི། དགེ་རྒྱལ་བར་མ་དཔོན་བླ་མ་ཀུན་དགའ་གྲགས་པ་མཆོག་གིས་ཕྱི་ལོ་༡༩༨༥ལོར་༸སྐྱབས་རྗེ་ཨཱ་འཛིན་སྐུ་ཕྲེང་གཉིས་པ་ཀརྨ་ཚུལ་ཁྲིམས་མཐར་ཕྱིན་མཆོག་གི་ཐུགས་དགོངས་རྫོགས་ཕྱིར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འདབས་སུ་ཕྱག་འདེབས་དབུ་བཙུགས་ཀྱིས་ཕྱི་ལོ་༡༩༩༠ལོར་གསར་བཞེངས་ལེགས་གྲུབ་བྱུང་སྟེ། ༸སྐྱབས་རྗེ་བློ་བཟང་རིན་པོ་ཆེ་དང་ཁྲ་རིག་དཔལ་ཀླུ་རིན་པོ་ཆེ་རྣམ་གཉིས་ཀྱིས་རབ་གནས་མཛད། དགེ་འདུན་གྱི་སྡེ་བཙུགས་ཏེ་ད་ཆ་འདུས་སྡེ་༡༨༤ཙམ་གྱིས་སྒྲུབ་བརྒྱུད་ཀརྨ་ཀཾ་ཚང་གི་རང་ལུགས་གཞིར་བཟུང་ནས་བཤད་སྒྲུབ་འཁོར་ལོ་གཉིས་ལྡན་གྱི་སྒྲུབ་བརྒྱུད་བསྟན་པ་རིན་པོ་ཆེ་ཉམས་མེད་རྒྱུན་སྐྱོང་གནང་གི་ཡོད། བྱམས་མགོན་ཀན་ཏིང་ཏཱའི་སི་ཏུ་རིན་པོ་ཆེ་མཆོག་གིས་རྟེན་གསུམ་རབ་གནས་དང་བཅས་དཔལ་ཐུབ་བསྟན་ངེས་དོན་བཤད་སྒྲུབ་དར་རྒྱས་གླིང་ཞེས་མཚན་གསོལ། གདན་ས་དཔལ་སྤུངས་ཤེས་རབ་གླིང་ནས་དགེ་བའི་བཤེས་གཉེན་སེངྒེ་ལ་སོགས་གདན་དྲངས་ཏེ་བོད་ཀྱི་རིག་གནས་སྤྱི་དང་། ཁྱད་པར་དུ་དཔལ་ལྡན་ཀརྨ་ཀཾ་ཚང་གི་མཐོང་བ་བརྒྱུད་པའི་ཕྱག་ལེན་མ་ཉམས་རྒྱུན་འཛིན་གནང་བཞིན་ཡོད།། །།

༄༅། །དཔལ་སྤུངས་ཐུབ་བསྟན་ཆོས་འཁོར་གླིང་ནི། བྱམས་མགོན་ཏཱའི་སི་ཏུ་སྐུ་ཕྲེང་བརྒྱད་པ་ཀུན་མཁྱེན་ཆོས་ཀྱི་འབྱུང་གནས་མཆོག་གིས་ཕྱི་ལོ་༡༧༢༧ལོར་ཁམས་སྡེ་དགེ་རུ་ཕྱག་བཏབ། རིམ་གྱིས་དགེ་འདུན་གྱི་སྡེ་མང་དུ་འདུས་པས་བཤད་གྲྭ་གནས་ལྔ་རིག་པའི་སློབ་གླིང་དང་།སྒྲུབ་གྲྭ་གོང་འོག་བར་གསུམ། པར་ཁང་དམ་ཆོས་བང་མཛོད་སོགས་ཡོད་པའི་བོད་ཀྱི་ཆོས་དང་རིག་གཞུང་གི་བསྟི་གནས་ཆེན་པོ་ཞིག་ཏུ་གྱུར། རྒྱ་གར་དུ་བྱམས་མགོན་ཏཱའི་སི་ཏུ་སྐུ་ཕྲེང་བཅུ་གཉིས་པ་པདྨ་དོན་ཡོད་གྲུབ་པ་མཆོག་གིས་ཕྱི་ལོ་༡༩༧༧ལོར་རྒྱ་གར་བྱང་ཕྱོགས་ཧི་མཱ་ཅལ་སྦིར་སྡེ་དགེ་གཞིས་ཁོངས་སུ་བྱེས་ཀྱི་གདན་ས་ཕྱག་བཏབ་སྟེ། ཀློག་པ་ཐོས་བསམ་གྱི་སྡེ་བཤད་གྲྭ་ལུང་རིགས་འཇམ་དཔལ་གླིང་དུ་ལོ་རིམ་འཛིན་གྲྭ་དང་པོ་ནས་དགུ་པའི་བར་དུ་བརྡ་སྤྲོད་དང་སྙན་ངགརིགས་ལམ་དང་ཚད་མ། དབུ་མ་དང་ཕར་ཕྱིན། མཛོད། དུས་འཁོར་དང་གསང་འདུས་འགྲེལ་ཆེན་སོགས་ལ་ཐོས་བསམ་གནང་ནས་མཁན་པོ་དང་། སློབ་དཔོན། སྐྱོར་དཔོན་མི་ཉུང་བ་ཐོན་པ་རྣམས་ཀྱིས་བོད་ཕྱི་ནང་གཉིས་སུ་འཆད་ཁྲིད་ཀྱི་འགན་བཞེས་མུས་ཡིན། དེ་བཞིན་སྤོང་བ་བསམ་གཏན་གྱི་སྡེ་སྒྲུབ་གྲྭ་ཏིང་འཛིན་དགེ་འཕེལ་གླིང་དང་བཙུན་མའི་སྒྲུབ་སྡེ་བྱང་ཆུབ་བསམ་གཏན་གླིང་གཉིས་སུ་ཕྱི་ནང་སྔོན་འགྲོ་ནས་བཟུང་རང་ལུགས་རྒྱུད་སྡེའི་བསྙེན་ཚད་དང་ཟབ་ལམ་ནཱ་རོ་ཆོས་དྲུགགྲོལ་ལམ་ཕྱག་རྒྱ་ཆེན་པོ་སྨིན་ཁྲིད་དང་བཅས་ལོ་གསུམ་ཕྱོགས་གསུམ་གྱི་ཉམས་ལེན་མཐིལ་ཕྱིན་གནང་གི་ཡོད།རྒྱུད་སྡེ་གྲྭ་ཚང་དུ་མར་ལུགས་རྒྱུད་སྡེ་རྣམས་ཀྱི་སྒྲུབ་མཆོད་དང་།དཔལ་སྤུངས་སྨོན་ལམ་ཆེན་མོ།ཐུགས་རྗེ་གསང་འདུས་སྒྲུབ་ཆེན།ལོ་མཇུག་ཏུ་བསྟན་འགྲོའི་བདེ་རིམ་མགོན་སྒྲུབ་དགུ་གཏོར་ཆེན་མོའི་སྒྲུབ་མཆོད་གར་འཆམ།གཏོར་བཟོ་རྒྱན་བཀོད།གར་ཐིག་དབྱངས་རོལ།འབུད་རྡུང་དཀྲོལ་གསུམ་བཅས་མཐོང་བ་བརྒྱུད་པ་ཉམས་བཞེས་དང་།རིག་གནས་སློབ་ཚན་བཅས་ལ་སྦྱང་བརྩོན་གནང་གི་ཡོད། གཞི་རིམ་སློབ་གྲྭ་རིགས་ལམ་སྐྱེད་ཚལ་དུ་སློབ་གྲྭ་སྤྱི་མཚུངས་ལྟར་འཛིན་གྲྭ་བརྒྱད་པ་བར་གཙོ་བོ་བོད་ཡིག་དང་།ཨིན་ཇི།ཨང་རྩིས་སོགས་ཀྱི་ཐོག་ནང་ཆོས་རིག་གནས་བཅས་ལ་སློབ་གཉེར་གནང་གི་ཡོད་པ་དང་།དེའི་རྗེས་བཤད་སྒྲ་དང་།རྒྱུད་སྡེ་གྲྭ་ཚང་གཉིས་སུ་ཆོས་ཞུགས་བྱ་ཆོགདེ་བཞིན་རིག་གནས་སློབ་གཉེར་ཁང་དུ་དུས་འཁོར་རྒྱུད་ལུགས་ཀྱི་རྩིས་གཞུང་དང་།གསོ་རིག་སྨན་གྱི་སློབ་སྦྱོང་བཅས་ལོ་རིམ་ལྔའི་སློབ་ཚན་དུ་སུམ་རྟགས་དག་གསུམ་དང་།སྒྲ་དང་སྙན་ངག་བཅས་ཀྱང་ཡོད།མཐའ་མ་བྱ་བ་ལས་ཀྱི་འཁོར་ལོར་བརྩོན་བཞིན་པ་རྣམས་ཀྱིས་རྟེན་གསུམ་གསར་བཞེངས་དང་།གསུང་རབ་པར་སྐྲུན་གནང་གི་ཡོད་ལ། བཙུན་མའི་སྡེ་ཀམ་ཚང་ཡེ་ཤེས་རབ་རྒྱས་གླིང་དུའང་ཀློག་པ་ཐོས་བསམ་དང་།སྤོང་བ་བསམ་གཏན། བྱ་བ་ལས་ཀྱི་འཁོར་ལོ་བཅས་ལ་བརྩོན་བཞིན་པ་བཅས་ཀྱི་གྲྭ་བཙུན་བསྡོམས་པའི་ཞལ་གྲངས་༦༦༠ཡིས་བཤད་སྒྲུབ་ལས་གསུམ་གྱིས་ཉིན་མཚན་འདའ་བཞིན་པ་ལགས་སོ།། །།

༄༅། ། བཀའ་རྙིང་བཤད་སྒྲུབ་གླིང་ནི། ༸སྐྱབས་རྗེ་ཨོ་རྒྱན་རིན་པོ་ཆེ་དང་།མ་ཡུམ་ཀུན་བཟང་བདེ་ཆེན།༸སྐྱབས་རྗེ་རྩི་ཀེ་མཆོག་གླིང་རིན་པོ་ཆེ།༸སྐྱབས་རྗེ་ཆོས་ཀྱི་ཉི་མ་རིན་པོ་ཆེ་བཅས་ཀྱིས་ཕྱི་ལོ་ ༡༩༧༦ ལོར་བལ་ཡུལ་གྱི་མཆོད་རྟེན་ཆེན་མོ་བྱ་རུང་ཁ་ཤོར་གྱི་ཉེ་འདབས་སུ་དགོན་པ་གསར་བཞེངས་གནང་། ༸རྒྱལ་དབང་ཀརྨ་པ་རིག་པའི་རྡོ་རྗེ་མཆོག་གིས་དབུ་འབྱེད་དང་རབ་གནས་མཛད། དེ་ནས་༸སྐྱབས་རྗེ་མཁན་ཆེན་ཁྲ་འགུ་རིན་པོ་ཆེ་དབུ་བཞུགས་ཀྱིས་གཞི་གསུམ་གྱི་ཕྱག་ལེན་དབུ་བཙུགས་ཏེ།ད་བར་ཆད་མེད་དུ་གནས་ཡོད་པའི་སྟེང་གནའ་དེང་རིག་གནས་སྤྱི་དང་། ཁྱད་པར་དུ་མདོ་སྔགས་གཞུང་ལུགས་དང་བཅས་པར་གཞི་རིམ་དང་།འབྲིང་རིམ།སངས་རྒྱས་ཡེ་ཤེས་ཆེས་མཐོའི་བཤད་གྲྭ་རྣམས་སུ་ཐོས་བསམ་བྱེད་ཀྱི་ཡོད། དེ་བཞིན་ཤར་ནུབ་ཀྱི་མི་རིགས་ཡོངས་ནས་སྟོན་པ་ཤཱཀྱའི་དབང་པོའི་བསྟན་པའི་གནད་དོན་རྟོགས་སླད་རང་བྱུང་ཡེ་ཤེེས་བཤད་གྲྭ་དང་། བལ་ཡུལ་མི་མང་གི་ཆེད་བོ་དྷི་ཛྙཱ་ན་ཞེས་པའི་ཡན་ལག་སློབ་གྲྭ་བཙུགས་ཡོད། ཆོ་ག་ཕྱག་བཞེས་ནི།གཏེར་ཆེན་མཆོག་གླིང་གི་ཟབ་གཏེར་གྱི་སྲོལ་བཟང་གཏོར་བཟོ་དཀར་རྒྱན་དང་། འབུད་རྡུང་དཀྲོལ་གསུམ། གར་ཐིག་དབྱངས་གསུམ་བཅས་ཚོགས་མཆོད་དང་།དགུ་གཏོར། བཀའ་བརྒྱུད་མགུར་མཚོ་དང་མི་ལའི་བླ་སྒྲུབ་ཟུང་སྦྲེལ་དབྱར་གནས་བཅས་ལོ་ལྟར་ཆད་མེད་གནང་བཞིན་ཡོད། དེ་བཞིན་ལོ་གསུམ་བཅད་རྒྱ་གནང་བའི་སྒྲུབ་བླ་དང་།བཤད་གྲྭ་མཐར་ཕྱིན་པའི་མཁན་པོ་དང་། སློབ་དཔོན་མང་པོ་བྱོན་དང་འབྱོན་བཞིན་ཡོད།། །།

༄༅། །བན་ཆེན་ཕུན་ཚོགས་དར་རྒྱས་གླིང་དགོན་ནི། དུས་རབས་བཅུ་བདུན་པར་སངས་རྒྱས་མཉན་སྤྲུལ་བཞི་པ་དགེ་ལེགས་རྒྱ་མཚོས་མདོ་ཁམས་སྒ་སྟོད་དུ་ཕྱག་བཏབ་ཅིང་།བྱེས་སུ་ཕྱི་ལོ་༡༩༨༦ལོར་གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་གིས་བལ་ཡུལ་འཕགས་པ་ཤིང་ཀུན་གྱི་ཉེ་འདབས་སུ་གཙུག་ལག་ཁང་གི་རྟེན་དང་བརྟེན་པ་བཅས་གསར་བཞེངས་གནང་།དེ་ཡ་གྱལ་བལ་ཡུལ་ཡང་ལེ་ཤོད་ཀྱི་སྒྲུབ་སྡེ་འོད་གསལ་གླིང་དང་།བཙུན་མའི་སྒྲུབ་སྡེ་ཨཱརྱ་ཏཱ་ར་གླིང་། གཞི་རིམ་སློབ་གྲྭ་མཁྱེན་རབ་པད་ཚལ་གླིང་བཅས་གསར་བཞེངས་གནང་། ཕྱི་ལོ་༢༠༠༤ལོར་ཡང་ལེ་ཤོད་ཨ་སུ་རའི་སྒྲུབ་ཕུག་གི་ཉེ་འདབས་སུ་བཤད་གྲྭ་ནང་བསྟན་ཐོས་བསམ་གླིང་གི་རྟེན་དང་བརྟེན་པ་བཅས་གསར་བཞེངས་གནང་། སློབ་གཉེར་གནང་ཕྱོགས་ནི།གྲྭ་ཚང་དུ་བཀའ་གཏེར་གསར་རྙིང་གི་རྒྱུད་སྡེ་རྣམས་འདོན་སྒྲིག་དང་། གར་ཐིག་དབྱངས་གསུམ། གཏོར་བཟོ་བཤམས་བཀོད། བསྐྱེད་རྫོགས་ཀྱི་ཉམས་ལེན་ཐོག་བརྡ་དག་སྙན་གསུམ་དང་། གཞུང་ཆེན་ཁག་ལ་རང་རང་སོ་སོའི་རྒྱུད་ཚོད་དང་བསྟུན་ཏེ་ཐོས་བསམ་སློབ་གཉེར་གནང་བཞིན་ཡོད་པ་མ་ཟད། ལོ་ལྟར་བོད་ཟླ་དང་པོའི་སྨོན་ལམ་ནས་བཟུང་རྒྱུད་སྡེ་རྣམས་ཀྱི་རས་བྲིས་དང་རྡུལ་ཚོན་གང་རུང་ལ་བརྟེན་པའི་སྒྲུབ་མཆོད་ཁག་སྨིན་སྒྲུབ་གནང་བཞིན་ཡོད། སྒྲུབ་གྲྭ་རུ་ཕྱག་ཆེན་སྔོན་འགྲོ་ནས་བཟུང་ལོ་གསུམ་ཕྱོགས་གསུམ་གྱི་རིང་ཐབས་ལམ་ནཱ་རོ་ཆོས་དྲུག་དང་། གྲོལ་ལམ་ཕྱག་རྒྱ་ཆེན་པོ། རྩ་གསུམ་ལྷ་ཚོགས་རྣམས་ཀྱི་བསྐྱེད་རྫོགས་བསྙེན་སྒྲུབ་བཅས་ཉམས་སུ་བཞེས་བཞིན་ཡོད། བཤད་གྲྭ་རུ་གཙོ་བོ་རང་ལུགས་མདོ་སྔགས་གཞུང་ཆེན་བརྒྱད་དང་། དེ་བཞིན་བརྡ་དག་སྙན་གསུམ་དང་རྒྱལ་རབས་ཆོས་འབྱུང་སོགས་ལ་སློབ་གཉེར་གནང་གི་ཡོད། དེ་བཞིན་དགེ་འདུན་པ་ཐུན་མོང་ནས་དམ་ཆོས་འདུལ་བའི་གཞི་གསུམ་གྱི་ཕྱག་ལེན་ཉམས་བཞེས་ཐོག གུ་རུ་ཆོས་དབང་གི་བླ་མ་གསང་འདུས་ཀྱི་སྒོ་ནས་ཚེས་བཅུ་ཆེན་མོའི་གར་འཆམ་དང་། མཆོག་གླིང་གི་ཟབ་བདུན་ཕུར་པའི་སྒྲུབ་ཆེན་གྱི་གཏོར་རྒྱག་འཆམ་དང་ལས་བཞིའི་སྦྱིན་སྲེག་བཅས་རེས་མོས། སྒྲུབ་བརྒྱུད་ཀརྨ་ཀཾ་ཚང་གི་ཐུན་མིན་ཕྱག་བཞེས་དཔལ་ཡེ་ཤེས་ཀྱི་མགོན་པོའི་བདུན་སྒྲུབ་དང་འབྲེལ་བའི་གར་འཆམ་གཏོར་རྒྱག་དང་ལས་བཞིའི་སྦྱིན་སྲེག་བཅས་གནང་སྲོལ་ཡོད། དེང་སྐབས་གྲུབ་དབང་སངས་རྒྱས་མཉན་པ་རིན་པོ་ཆེ་མཆོག་དང་༸སྐྱབས་རྗེ་བསྟན་དགའ་ཆུང་སྲིད་རིན་པོ་ཆེ་མཆོག་དབུ་བཞུགས་ཐོག་དགེ་འདུན་པ་ཞལ་གྲངས་༤༥༦ཙམ་བཞུགས་པའོ།། །།

༄༅། །བཙུན་དགོན་དཔལ་སྤུངས་ཡེ་ཤེས་རབ་རྒྱས་གླིང་ནི། རྒྱ་གར་དུ་བྱམས་མགོན་རྡོ་རྗེ་འཆང་གི་ཐུགས་དགོངས་ལྟར་གདན་སའི་ཚོགས་པས་ཕྱི་ལོ་༢༠༠༧ལོར་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་ཀུ་ལུ་བྷ་ཇོ་ར་ས་གནས་སུ་བྱེས་ཀྱི་དགོན་སྡེ་འདི་ཉིད་གསར་བཞེངས་གནང་ཞིང་།དཔལ་སྤུངས་ཡེ་ཤེས་རབ་རྒྱས་གླིང་ཞེས་པའི་མཚན་གསོལ་མཛད། ཕྱི་ལོ་༢༠༡༣ལོར་འགོ་བཙུགས་ཀྱིས་གཙུག་ལག་ཁང་དང་།ཡང་ཐོག་གཟིམ་ཆུང་།བཙུན་མའི་ཤགའཛིན་ཁང་སོགས་གདན་སའི་འཛིན་སྐྱོང་ཚོགས་པས་མཐུན་འགྱུར་དང་ལས་སྣེ་ཡོངས་ཀྱིས་འབད་བརྩོན་ལ་བརྟེན་ནས་ཕྱི་ལོ་༢༠༡༨ལོར་ཕྱི་ནང་རྟེན་དང་བརྟེན་པ་བཅས་གསར་བཞེངས་ལེགས་གྲུབ་བྱུང་། དེང་སྐབས་བཙུན་མ་ཞལ་གྲངས་༡༧༥ཙམ་གྱིས་ཡི་གེ་འབྲི་ཀློག་ནས་བཟུང་ཨིན་ཡིག་དང་ཧིནྡཱི།ཨང་རྩིས་བཅས་ལོ་རིམ་གསུམ་པ་བར་དང་། རིག་གནས་དང་གཞུང་ཆེན་བཀའ་པོད་ལྔ་བཅས་ལ་ལོ་རིམ་དགུ་བར་གཏན་འབེབས་ཀྱིས་སྦྱང་བརྩོན་གནང་བཞིན་པ་མ་ཟད། སྨན་རྩིས་རིག་གནས་དམིགས་བསལ་ཐོག་གདན་སའི་རིག་གནས་མཐོ་སློབ་ཏུ་ཆེད་ཞུགས་བྱས་ཏེ།ལོ་རིམ་བརྒྱད་མཐར་ཕྱིན་རྗེས་སྨན་རྩིས་བསྡུས་ར་བ་དང་། བཀའ་བཅུ་པ་བཅས་ཆེད་ཐོན་བྱ་རྒྱུའི་མཐུན་ཆ་ཚང་ཡོད། དཔལ་སྤུངས་པའི་སྔ་སྲོལ་ལྟར་ཆོ་ག་ཕྱག་ལེན་དང་འབུད་རྡུང་བཀྲོལ་གསུམ། གཏོར་བཟོ་རྒྱན་བཀོད་སོགས་སྒྲུབ་སྡེ་བྱང་ཆུབ་བསམ་གཏན་གླིང་དུ་མར་མི་དྭགས་གསུམ་གྱི་བླ་སྒྲུབ་དང་། ཡི་དམ་ཕག་བདེ་རྒྱུད་གསུམ་གྱི་བསྙེན་སྒྲུབ། ཟབ་ལམ་ནཱ་རོ་ཆོས་དྲུག་དང་ཤངས་པའི་གསེར་ཆོས་ནི་གུ་ཆོས་དྲུག་སོགས་གདན་སའི་མཐོང་བ་བརྒྱུད་པ་ལྟར་ལོ་གསུམ་ཕྱོགས་གསུམ་གནང་གྲུབ་པ་བཅས། བཙུན་མ་རྣམས་ཀྱིས་མཐོང་བ་བརྒྱུད་པའི་ཆོ་ག་ཕྱག་ལེན་དང་གཞུང་ཆེན་ཁག་ལ་སློབ་གཉེར་གནང་གྲུབ་རྗེས་སྐྱོར་དཔོན་དང་།སློབ་དཔོན། མཁན་མོ་སོགས་གདན་སའི་བཙུན་པའི་སྡེ་དང་གཅིག་མཚུངས་ལྟར་གནང་སྟེ། གདན་ས་དཔལ་སྤུངས་ཤེས་རབ་གླིང་གི་འཛིན་སྐྱོང་ཚོགས་པ་དང་བླ་བྲང་གིས་གཟིགས་སྐྱོང་འོག་བཙུན་དགོན་འདི་དར་རྒྱས་འགྲོ་བཞིན་ཡོད།། །།

༄༅། །བཙུན་དགོན་འོད་གསལ་ཀརྨ་ཐེག་མཆོག་གླིང་ནི། བོད་དུ་༸སྐྱབས་རྗེ་མཁན་ཆེན་ཚུལ་ཁྲིམས་རྒྱ་མཚོ་རིན་པོ་ཆེ་མཆོག་གིས་སྦས་ཡུལ་ཡོལ་མོ་གངས་ར་ཞེས་པའི་སྒྲུབ་གནས་སྟག་ཕུག་སེངྒེ་རྫོང་དུ་སྟག་ཕུག་མཉམ་ཉིད་གླིང་ཞེས་པའི་སྒྲུབ་སྡེ་གསར་བཞེངས་གནང་། དེའི་ཉེ་འཁྲིས་སུ་རྒྱལ་བ་རྒོད་ཚང་པའི་སྒྲུབ་གནས་རྒོད་ཐང་གི་གནས་སུ་རྒོད་ཐང་བདེ་ཆེན་གླིང་ཞེས་པའི་དགོན་པ་གསར་བཞེངས་གནང་། བལ་ཡུལ་དུ་ཕྱི་ལོ་༢༠༠༥ལོར་སྒྲུབ་སྡེ་རྒྱ་བསྐྱེད་ཀྱིས་བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འདབས་སུ་བཙུན་དགོན་འོད་གསལ་ཀརྨ་ཐེག་མཆོག་གླིང་འདི་ཉིད་གསར་བཞེངས་གནང་སྟེ།འགྲོ་བ་ལྷ་དང་བཅས་པའི་བསོད་ནམས་གསོག་པའི་ཞིང་སར་གཙུག་ལག་ཁང་རྟེན་དང་བརྟེན་པ་བཅས་གསར་བཞེངས་ལེགས་པར་གྲུབ་སྟེ།ད་ཆ་བཙུན་མ་༦༨ཀྱིས་རྒྱུན་འཛིན་གནང་བཞིན་ཡོད།། །།

༄༅། །བཛྲ་བིདྱཱའི་གཙུག་ལག་སློབ་གཉེར་ཁང་ནི། ༸སྐྱབས་རྗེ་མཁན་ཆེན་ཁྲ་འགུ་རིན་པོ་ཆེ་མཆོག་གིས་ཕྱི་ལོ་༡༩༩༩ལོར་གཞུང་ཆེན་ཁག་ལ་སློབ་གཉེར་གནང་ཡུལ་མཐོ་རིམ་བཤད་གྲྭ་ཞིག་ངེས་པར་དགོས་མཁོར་གཟིགས་ཏེ་ཡུལ་ཝཱ་རཱ་ཎ་སཱི་རུ་ཕྱག་བཏབ་པ་ཞིག་ཡིན། གཙུག་ལག་ཁང་རྟེན་དང་བརྟེན་པ་བཅས་གསར་བཞེངས་ལེགས་པར་གྲུབ་སྟེ་བྱམས་མགོན་ཏཱའི་སི་ཏུ་རིན་པོ་ཆེ་དང་། གཽ་ཤྲཱི་རྒྱལ་ཚབ་རིན་པོ་ཆེ་རྣམ་གཉིས་གཙོས་བླ་སྤྲུལ་མང་པོས་སྒྲུབ་མཆོད་དང་བྱིན་འབེབས་རབ་གནས་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸ཞབས་པད་ཆིབས་བསྒྱུར་སྔ་ཕྱིར་བསྐྱངས་ཏེ་གཙུག་ལག་ཁང་གི་རྟེན་དང་བརྟེན་པ་བཅས་དབུ་འབྱེད་དང་རབ་གནས་བྱིན་རླབས་བསྩལ། ལོ་དེའི་ཟླ་༡༡ནང་ཀམ་ཚང་གི་བཤད་གྲྭ་ཁག་མཉམ་འཛོམས་ཀྱིས་ཀརྨ་དགུན་ཆོས་དབུ་བཙུགས། དེ་ནས་བཟུང་སྟག་མོ་ལུས་སྦྱིན་གྱི་བཤད་གྲྭའི་དགེ་འདུན་པ་རྣམས་གནས་སྤོས་ཏེ་དབྱར་དུས་སྟག་མོ་ལུས་སྦྱིན་གྱི་བཤད་གྲྭ་དང་། དགུན་དུས་ཝཱ་རཱ་ཎ་སཱིའི་བཤད་གྲྭ་རུ་གཏན་བཞུགས་གནང་།དགོན་འདིར་དགྱེས་རྡོར་ཡབ་བཀའ་དང་ཡུམ་བཀའི་བཀའ་བབས་བྱུང་བ་བཞིན་ཕྱི་ལོ་༢༠༠༤ལོར་བྱམས་མགོན་ཀྭན་ཏིང་ཏཱའི་སི་ཏུ་རིན་པོ་ཆེ་མཆོག་གདན་དྲངས་ཏེ་དགྱེས་པ་རྡོ་རྗེའི་བཀའ་དབང་བསྩལ་པ་ནས་བཟུང་དགྱེས་པ་རྡོ་རྗེའི་སྒྲུབ་ཆེན་ལོ་ལྟར་འཚོག་གི་ཡོད་པ་དང་།གཽ་ཤྲཱི་རྒྱལ་ཚབ་རིན་པོ་ཆེས་ཡུམ་བཀའ་བདག་མེད་ལྷ་མོ་བཅོ་ལྔའི་དབང་བསྐུར་བ་ནས་བཟུང་ཡུམ་བཀའ་བདག་མེད་ལྷ་མོ་བཅོ་ལྔའི་སྒྲུབ་ཆེན་གསར་འཛུགས་གནང་། ཕྱི་ལོ་༢༠༡༠ལོར་པཎ་ཆེན་ནཱ་རོ་ཡབ་སྲས་ཀྱི་གདན་ས་བྱང་པུཥྤ་ཧ་རིའི་ས་གནས་སུ་བཛྲ་བིདྱཱ་ཕུ་ལ་ཧ་རི་ཁྲ་འགུ་དགོན་པ་གསར་བཞེངས་འགོ་བཙུགས་ཀྱིས་ཕྱི་ལོ་༢༠༡༣ལོར་རྟེན་དང་བརྟེན་པ་བཅས་པ་གསར་བཞེངས་ལེགས་གྲུབ་བྱུང་། གནས་འདི་འགྲོ་མགོན་བཀའ་བརྒྱུད་པཎ་ཆེན་ནཱ་རོ་པའི་གདན་ས་དང་སྒྲ་སྒྱུར་མར་པ་ལོ་ཙཱ་བས་གསང་སྔགས་བླ་མེད་ཀྱི་སྡེ་གསན་བསམ་སྒོམ་སྒྲུབ་གནང་ཡུལ་སོགས་ཡིན་པས།སྐུ་མཚམས་བཞུགས་མཁན་རྣམས་སྲས་མཁར་སྒྲུབ་ཁང་དུ་ལོ་གསུམ་ཕྱོགས་གསུམ་དུས་འཁོར་བཅས་ལོ་བཞིའི་སྐུ་མཚམས་གྲོལ་བའི་རྗེས་ཟླ་བ་གསུམ་རིང་བཅོམ་ལྡན་འདས་དགྱེས་པ་རྡོ་རྗེའི་བསྙེན་མཚམས་བཞུགས་རྒྱུ་གཏན་འབེབས་གནང་བ་བཞིན།སྲས་མཁར་སྒྲུབ་ཁང་སྐུ་མཚམས་གྲོལ་རྗེས་དགྱེས་པ་རྡོ་རྗེའི་བསྙེན་མཚམས་བཞུགས་དང་བཞུགས་མུས་ཡིན།།།།

༄༅། །བསམ་འགྲུབ་དར་རྒྱས་ཆོས་གླིང་ནི། ༸སྐྱབས་རྗེ་ཀ་ལུ་རིན་པོ་ཆེ་མཆོག་གིས་ཕྱི་ལོ་༡༩༦༦ལོར་རྡོ་རྗེ་གླིང་ཉེ་འདབས་སོ་ནཱ་དཱ་ཡི་ས་གནས་སུ་ཕྱག་བཏབ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན། རྩེ་རྣམ་རྒྱལ་གྲྭ་ཚང་དང་།རྒྱུད་སྟོད་སྨད་གཉིས་ཀྱི་མཁན་བླ་སྤྲུལ་སོོགས་ལ་ཤངས་པའི་གསེར་ཆོས་རྣམ་ལྔ་དང་། མགོན་བཀའ་བཅུ་གསུམ། གཏེར་གསར་ཕུར་པ་བཅས་ཀྱི་དབང་ལུང་གནང་། ད་ལྟའི་མཆོག་སྤྲུལ་རིན་པོ་ཆེ་མཆོག་ཏཱའི་སི་ཏུ་རིན་པོ་ཆེ་དང་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་པ་མཆོག་རྣམ་གཉིས་ཀྱིས་ཡེ་ཤེས་དག་པའི་གཟིགས་ངོར་སྐུ་གོང་མའི་ཡང་སྲིད་འཁྲུལ་བྲལ་དུ་བཀའ་ལུང་ཕེབས་ཤིང་།ཕྱི་ལོ་༡༩༩༣ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགོན་པ་འདིར་ཆིབས་བསྒྱུར་བཀའ་དྲིན་བསྐྱངས་སྐབས་དབུ་སྐྲ་གཙུག་ཕུད་འབུལ་བཞེས་མཛད།དེང་སྐབས་ཀ་ལུ་མཆོག་སྤྲུལ་རིན་པོ་ཆེའི་དབུ་འཁྲིད་འོག་དགེ་འདུན་ཞལ་གྲངས་༡༢༠ཙམ་གྱིས་རྒྱུན་འཛིན་གྱི་ཡོད།། །།

༄༅། །འཆི་མེད་གྲུབ་པའི་དགའ་ཚལ་ནི། ཨ་ཕོ་རིན་པོ་ཆེ་ཡེ་ཤེས་རང་གྲོལ་མཆོག་གིས་ཕྱི་ལོ་༡༩༧༠ལོར་རྒྱ་གར་བྱང་ཕྱོགས་ཀུ་ལུ་མ་ན་ལི་ཅ་ཊ་རི་ཞེས་པར་གསར་བཞེངས་གནང་། འདུ་ཁང་གི་ནང་རྟེན་གཙོ་བོ་སངས་རྒྱས་བྱང་སེམས་ཀྱི་སྐུ་བརྙན་སོགས་དང་། གསུང་རྟེན་རྒྱལ་བའི་བཀའ་བསྟན་ཆ་ཚང་།མར་མི་དྭགས་གསུམ་གྱི་རྣམ་མགུར་དང་། མཁྱེན་བརྩེ་ཆོས་ཀྱི་བློ་གྲོས་བཅས་ཀྱི་བཀའ་འབུམ་ཤིང་པར་བཞུགས། དེང་སྐབས་སྤྲུལ་སྐུ་དགེ་ལེགས་རྣམ་རྒྱལ་མཆོག་དབུ་བཞུགས་ཐོགདགེ་འདུན་པ་ཞལ་གྲངས་༡༡ཙམ་གྱིས་རང་ལུགས་དཔལ་ལྡན་འབྲུག་པ་བཀའ་བརྒྱུད་ཀྱི་ཐུན་མིན་ཆོས་སྤྱོད་ཁག་ལ་ཉམས་བཞེས་དང་། ལོ་ལྟར་དཔལ་རྡོ་རྗེ་ཕུར་པའི་གཏོར་ཟློག་དང་།མར་པ་ལོ་ཙཱ་བ་དང་།རྗེ་བཙུན་མི་ལ་རས་པ།མཉམ་མེད་དྭགས་པོ་ལྷ་རྗེ་གསུམ་གྱི་འདས་མཆོད།ལོ་འཁོར་དུས་མཆོད་བཅས་ཆད་མེད་སྨིན་སྒྲུབ་གནང་གི་ཡོད་པ་མ་ཟད།མདོ་སྔགས་རིག་གནས་དང་བཅས་པར་ཐོས་བསམ་གནང་བཞིན་པའོ།། །།