༄༅།།བོད་ཚེས་༡༥འདི་ཉིན་གསོལ་ཚོགས་སྔ་གྲོལ་གྱིས་དགོང་དྲོ་བར་སྐོར་ནང་གཞུང་གནས་དང་།རྒྱལ་སྤྲུལ་སོགས་བླ་བྲང་ཆེ་ཁགམཁན་པོ་ཁགརྒྱུད་གྲྭ་སྨད་སྟོད།བཀའ་བློན་རྣམ་པ།རྩེ་ཤོད་ཕྱག་མཛོད་དང་།ཡབ་གཞིས།སྡེ་དཔོན་ཆེ་ཁགལྷ་གཉེར་སོགས་ཀྱི་མཆོད་པ་མར་ཚོན་སྣ་ཚོགས་ཀྱིས་བཞེངས་པའི་མཆོད་ལྷ་དང་།རྒྱལ་བ་རིགས་ལྔ་།རྗེ་ཡབ་སྲས།སྟག་སེང་ཁྱུང་འབྲུགམཐུན་པ་མཆེད་བཞི།རྟགས་བརྒྱད།རྫས་བརྒྱད་སོགས་ཇི་སྙེད་ཅིག་བཀོད་པ་མཛེས་ཤིང་བརྗིད་ཆེ་དཔང་མཐོ་བའི་མཆོད་པ་ཚར་དུ་དངར་བ་བར་སྐོར་འཁོར་ཡུག་ཏུ་བསྒྲིགས་གཤོམས་དང་འབྲེལ་དགོང་དྲོ་ས་སྲིབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་དབུ་གཡབ་མེད་པའི་ཕེབས་བྱམས་སུ་བཞུགས་འཁོད་དང་འབྲེལ་ཆིབས་ཞབས་སུ་གུང་དང་བཀའ་བློན།ཛ་དར་ཏ་ཐའི་ཡིས་མཚོན་དྲུང་རིགས་སེར་སྐྱ་ཚང་མ་མཚན་རིམ་བཞིན་བསྟར་བསྒྲིགས་ཀྱིས་ཕེབས།མཆོད་གཟིགས་བཀྲིན་ཆེ་སྟེ་མཆོད་པ་སོ་སོའི་མདུན་དུ་མཆོད་བདག་སོ་སོས་སྐབས་མཚམས་སྐུ་ཕྱག་དང་འབྲེལ་མཇལ་དར་ཕུལ་བ་རང་སློག་སྩལ།རྩེ་མཁན་དྲུང་སྐུ་བགྲེས་ནས་སྡེ་ཚན་སོ་སོའི་མཆོད་གཞུང་སྙན་སྒྲོན་དང་འབྲེལ་ཨང་རིམ་ཇི་སྩལ་ཨང་རྟགས་བཀོད།མཆོད་གཟིགས་སུ་ཆིབས་བསྒྱུར་གྱི་སྔོན་ཚུད་གཟིམ་སྦྱོང་དམག་སྒར་ནས་ཆིབས་བསྒྱུར་མ་གྲུབ་བར་མི་མང་འགྲུལ་བཞུད་འགོག་པའི་ཐག་རྒྱ་བཏང་།ཆིབས་བསྒྱུར་སྐབས་བླ་སྟེང་དབུ་རྩེ་ནས་གར་རོལ་བས་ཕེབས་བརྡ་མདའ་མ་དང་།རྒྱ་གླིང་བཏང་།ཕེབས་རས་བཏིང་།སྐུ་སྲུང་དམག་སྒར་གྱིས་སྦ་ཆ་དང་།འཕྲེད་གླིང་བཏང་སྟེ་ཕེབས་གདོང་དུ་དལ་བུས་བསྐྱོད།དེའི་གདོང་དུ་འབྲས་ཚོགས་ཆེན་དགེ་བསྐོས་དང་།ཆབ་དམ་པ།ཞང་པོ་ཤིང་གཉེར།དགེ་གཡོགཐབ་གཡོག་སོགས་སྔོན་བསྐྱོད་ཀྱིས་ཐབ་གཡོག་ནས་སྐད་གསང་མཐོན་པོས་བརྡ་བསྐུལ་གཏོང་།རྩེ་སྐོར་གཞུང་ཞབས་ལོ་ན་ཕྲ་བ་བརྒྱད་ནས་སྔར་སྲོལ་གོས་སང་གི་སྒང་བཞུ་རིལ་རིལ་ཆེན་པོ་ཡུ་བ་རྔ་གཡབ་ལྟ་བུའི་རིང་པོ་བྱས་པ་འཁྱེར་ཏེ་མཆོད་པར་གཟིགས་འབུལ་ཞུ།ཐག་རྒྱའི་ནང་དུ་བར་སྐོར་འཁྱིལ་པོར་སྐུ་སྲུང་འགོ་དམག་སོགས་དམག་མི་རྣམས་གོ་མཚོན་རང་འགྲིགས་ཀྱིས་༸གོང་ས་ཆེན་པོ་ཕེབས་མཚམས་སོ་སོར་གུས་བཏུད་ཞུ།མཆོད་གཟིགས་གྲུབ་འཕྲལ་ཕེབས་མཇུག་དམག་སྒར་རྣམས་རུ་བསྒྲིགས་ཀྱིས་རང་རང་རོལ་ཆ་བཏང་སྟེ་བར་སྐོར་གཅིག་བསྐོར་ཏེ་ཁུངས་སོ་སོར་ཕྱིར་ལོགདེ་ནས་ཐག་རྒྱ་སློད་པ་དང་།མི་མང་འབུམ་སྐོར་འུར་ཏེ་བར་སྐོར་འཚང་ག་ཆེན་པོས་སྐབས་རེ་རྡོག་བརྫིས་ཀྱིས་མི་གསོད་པའང་ཡོང་སྲིད།དེ་ནས་རིམ་པས་འཚང་ག་ཆག་མཚམས་གཡས་ཡོན་ལུང་ཚན་སོ་སོའི་ཕོ་གཞོན་མོ་གཞོན་རྣམས་ཀྱིས་མཆོད་པའི་མདུན་དུ་རྐང་བྲོ་གླུ་གཞས་རིམ་ཕུལ་གྱི་ཡུལ་ཚན་སོ་སོའི་གཞས་ཚིག་གི་ཚིག་རྒྱག་ཐུག་སྟེ་ཚེས་༡༦གི་ནམ་མ་ལངས་བར་གཞས་བསྐོར་བཏང་སྟེ་སྡོད་པ་དང་།སྐབས་རེ་ཚིག་རྒྱག་ཐག་མ་ཆོད་བར་དེའི་སང་ཉིན་གླིང་སྐོར་ཕྱིར་གཞས་ཀྱི་འགྲན་བསྡུར་ཡང་བྱེད་སྲོལ་ཡོང་།ཡར་ངོའི་ཚེས་ཆ་གང་འོས་ལ་སྤྱན་བསལ་སྐུ་འགྱེད་ཅེས་རྩེ་གཟིམ་ཆུང་ནས་དམིགས་བསལ་གྱི་གསོལ་ཇ་དང།བཞེས་ཐུག་འབྲས་ཚ།སྐུ་འགྱེད་ཊམ་དཀར་རེ་བཅས་འཆར་ཅན་སྩལ་བ་རེད།།

༄༅།། བོད་ཟླ་ ༤ ཚེས་ ༡༥ རྒྱུ་སྐར་ས་ག་ཟླ་བའི་ཉ་ཡི་ཉིན་མོར་མཉམ་མེད་ཐུབ་པའི་དབང་པོ་སྐུ་བལྟམས་པའི་དུས་ཆེན་དང་། མངོན་པར་རྫོགས་པ་སངས་རྒྱས་པའི་དུས་ཆེན། མྱ་ངན་ལས་འདས་པའི་དུས་ཆེན་བཅས་གསུམ་འཛོམས་འཁེལ་བའི་ཉིན་གཞུང་སྒེར་ཁག་ནས་རྩེ་ཕོ་བྲང་དང་། གཙུག་ལག་ཁང་སོགས་ཡས་མས་ལ་མཆོད་པ་སྣ་ལྔའི་སྤྲིན་ཕུང་ཚར་དུ་དངར་བ་དང་། སྔ་དྲོ་ལྷ་ལྡན་སྤྲུལ་པའི་གཙུག་ལག་ཁང་དུ་རྟེན་གཙོ་རྣམས་ལ་༸གོང་ས་ཆེན་པོའི་ཐུགས་སྨོན་སྙན་ཤལ་བླ་ཕྱག་དང་། རྩེ་ཕོ་བྲང་ལ་རྩེ་ཕྱག་ནས་བསྡོགས་ཏེ་སྔ་ཉིན་ནས་རྩེ་གཟིམ་འགག་བརྒྱུད་ཐུགས་སྨོན་ཞུས་ཏེ་གོང་ཚེས་ཉིན་སྔ་དྲོ་ནམ་ལངས་མཚམས་ལ་ཕུལ།དེ་རྗེས་བཀའ་བློན་ལྷན་རྒྱས་དང་། ཤོད་སྐོར་ཡོངས་རྫོགས། རྩེ་ཡིག་ཚང། རྩེ་ཤོད་ཕྱག་མཛོད་སོགས་ལས་ཁུངས་ཁག་གི་ངོ་ལས་ཚང་མ་མཆོད་འབུལ་གནས་གཟིགས་སུ་ཕེབས་ཏེ་བཀའ་བློན་ལྷན་རྒྱས་ལྷ་ལྡན་གཙུག་ལག་ཁང་གི་གནས་གཟིགས་གྲུབ་རྗེས་རྨེ་རྙིང་ནས་ར་ཆེར་ཕེབས་སྐབས་སྣང་ཤག་ལས་ཁུངས་མདུན་དུ་མི་དཔོན་གཉིས་ནས་བཙོན་པ་མི་བཞི་ནག་ཡང་དགེ་བཀྲོལ་དུ་སྤྱན་ཞུས་གློད་བཀྲོལ་བཏང།དེ་ནས་རྗེ་འབུམ་ལྷ་ཁང་། ཞི་ཁྲོ་ལྷ་ཁང་། ར་ཆེ་གཙུག་ལག་ཁང་བཅས་པར་གནས་གཟིགས་ཀྱིས་གླིང་བསྐོར་དུ་ཞབས་ཐང་ལ་ཕེབས་ཏེ་ལྕགས་པོ་རིའི་རྒྱབ་བདེ་སྐྱིད་གླིང་གི་ཟུར་ནོར་གླིང་ཕེབས་ལམ་མཚམས་ནས་ཆིབས་ཐོག་ནོར་གླིང་ཕོ་བྲང་དུ་བཅར། བསྐལ་བཟང་ཕོ་བྲང་གི་རྟེན་གཙོར་༸སྙན་དར་སྒྲོན་འབུལ་མཛད། དྲུང་བཞེས་ཚུགས། ༸གོང་ས་མཆོག་མཇལ་ཁ་ཞུས། གསོལ་ཇ། བཞེས་འབྲས། དཀར་སྐྱོང་བཞེས་ཞོ། ཕེབས་སྒོ་བཞེས་ཟས་བཅས་ཕེབས། དེ་ནས་དྲུང་བཞེས་གྲོལ།བཀའ་བློན་རྣམ་པ་དང་། ཤོད་སྐོར་རྣམས་ཆིབས་ཐོག་རྩེ་ཕོ་བྲང་དུ་གནས་གཟིགས་ལ་ཕེབས། དེ་ནས་ཞབས་ཐང་ཞབས་བསྐོར་གྱིས་རྫོང་རྒྱབ་ཀླུ་ཁང་དུ་ཞོལ་གཉེར་དང་། བཀའ་ཤག་གསོལ་ཐབ་ནས་ཕེབས་སྒྲིག་སྔོན་ཞུས་ལྟར་གནས་གཟིགས་གྲུབ་འཕྲལ་གསོལ་ཇ།བཞེས་འབྲས།ཉིན་དགུང་གསོལ་ཚིགས་དཀར་སྐྱོང་རྒྱབ་ར་གསོས་པ་དང་།བཞེས་ཞོ་ཕུལ་ཏེ་སྐུ་ངལ་གནང་རིང་གླུ་གར་འབུལ་མི་རྣམས་ལ་ལེགས་དར་དང་། གསོལ་རས་སྩལ། དེ་ནས་བཀའ་བློན་རྣམ་པ་དང་གཞུང་ཞབས་བཅས་ཀོ་གྲུའི་ནང་མཚོ་བསྐོར་ལ་ཕེབས་སྐབས་ཀོ་གྲུ་གཞན་ཞིག་ནང་གླུ་གར་བ་རྣམས་ནས་སྒྲ་སྙན་ཧོའོ་ཅིན། དལ་ཅིན།ཡང་ཅིན། གླིང་བུ་སོགས་ཀྱི་སྦ་ཆ་དང་། རྣམ་ཐར་སོགས་བཏང་སྟེ་དཀར་ཕྱོགས་ལྷ་ཀླུར་མཆོད་པ་འབུལ་ཞིང་། མཚོ་བསྐོར་ལ་ཕེབས།དེ་མཇུག་ལྷ་ཞོལ་མི་མང་རྣམས་ཀྱང་རྫོང་རྒྱབ་གླིང་ཀའི་ནང་ངལ་གསོས་ཏེ༑ ཞལ་ལག་ཇ་ཆང་སོགས་ཀྱི་སྤྲོ་སྐྱིད་བཏང་ནས་རང་རང་འདོད་མོས་ཀྱི་ཀོ་གྲུ་གླས་པའི་ནང་བཞུགས་ཏེ་གཞས་རྣམ་ཐར། སྒྲ་སྙན་སོགས་བཏང་སྟེ་མཚོ་བསྐོར་དུ་འཚང་ག་ཤིག་ཤིག་འགྲོ་སྲོལ། བཀའ་བློན་རྣམ་པ་དང་།གཞུང་ཞབས་རྣམས་ར་ཆེ་བར་སླར་ཡང་ཞབས་ཐང་དང་། ར་ཆེའི་ཟུར་ནས་ཆིབས་ཐོག་ལ་རང་རང་སོ་སོའི་གཟིམ་ཤག་ལ་ཕྱིར་ཕེབས་གནང་ཡོང་།དེ་ཉིན་གཞུང་གི་ལས་ཁུངས་ཁག་དང་། འབྱོར་ལྡན་ཁག་ནས་ལྷ་སའི་སྐོར་ལམ་དུ་སློང་མོ་བ་ཡོད་ཚད་ལ་ཇ་ཞིབ་དང་། རྩམ་པ། དངུལ་འགྱེད་བཅས་དགེ་སྦྱིན་རྒྱ་ཆེན་པོ་གཏོང་སྲོལ་ཡོད་པ་མ་ཟད། མདོར་ན་བསྐོར་བར་འགྲོ་མི་དྲག་ཞན་འབྲིང་གསུམ་ཚང་མས་རང་རང་འཁོས་འབྱོར་ལ་དཔགས་པའི་སྦྱིན་འགྱེད་གཏོང་སྲོལ་ཡོད་སྟབས་ལྷ་ས་ཙམ་མ་ཡིན་པའི་གཡས་གཡོན་གྲོང་གསེབ་པ་རྒན་རྒོན་མང་པོ་སྤྲང་བརྫུས་ཀྱིས་སྦྱིན་ལེན་ཆེད་སྐོར་ལམ་ལ་བསྡད་ཡོང་།།

༄༅།། ལྷ་ས་ཉེ་འཁོར་སོགས་བོད་ཀྱི་ཞིང་པ་རྣམས་ཀྱིས་འོང་སྐོར་ཞེས་པ་གཏོང་སྲོལ་ཡོད། དེ་ནི་བོད་ཟླ་བདུན་པའི་ཡར་ངོའི་ཚེས་གྲངས་བཟང་བ་ཞིག་ལ་ཞིང་ཁའི་ཉེ་འགྲམ་ས་སྟོང་ཞིག་ལ་གུར་མང་པོ་རྒྱབ། གདན་ལྕོག་དང་། བཟའ་བཏུང་གི་སྟོན་མོ་རྒྱ་ཆེ་གྲ་སྒྲིག་བྱས། ཞིང་པ་ཕོ་མོ་རྣམས་སྔ་དྲོ་ཐོ་རེངས་ཁྲུས་དང། རྒྱན་གོས་གཟབ་འཕྱོར་གྱིས་བརྒྱན། ཞིང་བདག་རྣམས་གྱོན་པ་གོས་ཚོས་མན་སེར་པོའམ་སྙུག་ལྗང་གསེར་མ་སོགས་ཀྱི་ཕྱུ་ཆེན་ལ་ཤག་གྱོན། ཞྭ་འབོག་སེར་པོ་དང་། སོག་ཞྭ་དམར་པོ། འཇའ་ལྷམ་བཅས་གྱོན་ཏེ་རྟ་ཆས་སྤུས་དག་ཁ་གསར་རྒྱབ་པའི་རྟ་ཞོན། ཐོག་མར་ལག་སྟོད་པའམ། སེར་སྲུང་སྔགས་པ་ནས་སྔགས་ཆས་ཁ་གསར་སྤྲས་ཏེ་རྟ་ཐོག་སྲིད་པ་འཁོར་ལོ་ལྗོན་ཤིང་ལོ་མ་ཅན་ལ་སྒྲོགས་པ་ཁ་བཏགས་དཀར་པོ་རིང་པོ་བཏགས་པ་ལག་ཏུ་འཁྱེར།དེ་རྗེས་དཔའ་བོ་དཔའ་མོ་ཞེས་ཕ་མ་གཉིས་འཛོམས་ཀྱི་བུ་གཅིག་དང་།བུ་མོ་གཅིག་རྒྱན་གོས་ཀྱིས་སྤྲས་ཏེ་རྟ་ཐོག་ལག་གཡས་པར་མདའ་དར་རེ་འཁྱེར། དེ་རྗེས་ཞིང་བདག་རྟ་པ་རྣམས་ཕྲེང་བསྟར་ཏེ་སྔོན་ལ་དལ་བུས་བསྐྱོད། དེ་རྗེས་སྐྱེས་ཕོ་མོ་རྣམས་རྐང་ཐང་གིས་༸རྒྱལ་བའི་བཀའ་བསྟན་པོད་གཅིག་རེ་རྒྱབ་ཏུ་འཁྱེར་ནས་ཞིང་ཀ་རྣམས་ལ་བསྐོར་བ་རྒྱག་དུས་ཆོས་འཁྱེར་བ་རྣམས་ནས་ཆོས་ཚིག་གི་གླུ་གཞས་ཀྱང་ལེན་པ་བཅས་ཉིན་དགུང་ཙམ་ལ་ཞིང་ཁའམ། འོང་ཁ་བསྐོར་ཟིན་པ་བྱེད། དེ་ནས་ཇ་ཆང་དང། སྟོན་མོར་ལོངས་སྤྱད་དེ་རྐང་གྲོ་གླུ་གཞས་ཀྱིས་གར་སྐྱིད་དུ་སྡོད་པ་དང་། ལག་སྟོད་པའམ།སྔགས་པ་བཞུགས་ཡུལ་དབུ་གུར་ཁེ་གཙང་ཞིག་ནང་བཞུགས་ཏེ་ཡུལ་ལྷའི་གསོལ་མཆོད་མཛད། དེ་ནས་དགོང་དྲོ་ཉི་མ་མ་བརྒལ་ཙམ་ལ་ཕྱི་དྲོའི་གསོལ་སྟོན་གྲུབ་རྗེས་བསང་བུམ་ཞིག་བསླངས་ཏེ་དེ་ལ་མེ་སྤར་ནས་ཚང་མས་ཀི་བསྭོའིི་ལྷ་རྒྱལ་བཏང་སྟེ་གྲོལ་ནས་རང་ཁྱིམ་དུ་ལོག་ཡོང་། གྲ་སྒྲིག་བྱེད་པོ་རྣམས་དེ་ནུབ་དེར་བསྡད་དེ་ཕྱི་ཉིན་ཕྱིར་ལོག་འགྲོ་བ་རེད། དེའི་སང་ཉིན་ལག་སྟོད་པ་དང་། གཞིས་འགོའི་འཐུས་མི་དྲག་པ་གཅིག་རྩེ་གཟིམ་ཆུང་འགག་ཏུ་བཅར་ཏེ་༸གོང་ས་ཆེན་པོའི་མཇལ་ཁའི་སྙན་སེང་གཞེས་བརྡ་ཞུས། དེ་ནས་ཉིན་གཉིས་རྗེས་ལག་སྟོད་པ་དང་།གཞིས་འགོ་རྣམས་དང་ཞིང་པ་རྣམས་༸གོང་ས་ཆེན་པོའི་མཇལ་ཁར་བཅར། ལོ་ཏོག་རྣམས་ཀྱི་སྤུས་ཚད་ཀྱི་ཕུད་གཟིགས་འབུལ་བསྟར་སྲོལ་བཅས་ཡོད་པ་རེད།།

༄༅།།བོད་ཟླ་༡ཚེས་༤ཉིན་ནས་ལྷ་ལྡན་ཆོ་འཕྲུལ་སྨོན་ལམ་ཆེན་མོའི་གསོལ་ཚོགས་དངོས་གཞི་དབུ་ཚུགས་རྒྱུར།ཆོས་སྡེ་ཆེན་མོ་འབྲས་སེ་དགའ་གསུམ་དང།དགོན་སྡེ་སྒྲིག་ཉིས་འཛིན་ཁག་གི་དགེ་འདུན་རྣམས་འཁྱམས་ར་དང་།བར་སྐོར་ཕྱི་ནང་།སེ་ར་ལྟག་སྒོ།མདའ་གཡབ་འོག་ཤིང་ར་བཅས་ལ་བསྡོམས་དགེ་འདུན་ཉིས་ཁྲི་བརྒལ་བ་དང་།གསུང་ཆོས་ར་བའི་མདོར་དགེ་འདུན་དང་དབོན་སེར་གཟུགས་ཁྱོན་གྲངས་ཉིས་སྟོང་སྐོར་ཡོད།༸གོང་ས་༸སྐྱབས་མགོན་ཆེན་པོ་སྨོན་ལམ་ཚོགས་མགོན་དུ་ཆིབས་བསྒྱུར་ཆེ་མོ་ཡོད་སྐབས་ཁྲོམ་གཟིགས་ཁང་གི་རྒྱབ་ཐང་དུ་གནས་ཆུང་ཆོས་རྒྱལ་ཆེན་པོ་འཚམས་ཞུའི་མཇལ་དར་དུ་ཕེབས་སྲོལ་ཡོད།སྨོན་ལམ་ཞག༢༡ཚུགས་རིང་ཉིན་རེར་གསོལ་ཇ་བདུན་དང་།བཞེས་ཐུག་གཉིས་རེ་བཅས་བསྟན་པ་མཆོད་སྦྱིན་གྱི་མངའ་བདག་གཞུང་གནས་ནས་ཐུགས་འགན་གཙང་བཞེས་ཐོག་༸རྒྱལ་མཆོག་༸གོང་མ་རིམ་བྱོན་གྱི་དགོངས་རྫོགས་ཆེད་སྐུ་འགྱེད་དང་།དེ་བཞིན་རྩེ་གཟིམ་ཆུང་ནས་སྤྱན་བསལ་སྐུ་འགྱེད་བཅས་བསྟར་ཆགས་དང་།གཞན་ཡང་ལི་ཐང་ཨ་འབྲུག་ཚང་ནས་ཐོག་མའི་ཐེབས་སྦྱར་གྱིས་སྒོ་འཕར་དབྱེ་བས་མཚོན་དད་ལྡན་འདས་གསོན་ཁག་གི་ཆེད་དུ་སྨོན་ལམ་སྐབས་སྐུ་འགྱེད་སོགས་ཐེབས་སྦྱར་འཇོག་མི་དང་མང་ཇ་བཞེས་ཐུག་སྐུ་འགྱེད་བཅས་འཕར་མའི་དོད་འབུལ་དང་།ལག་འདོན་ཞུ་མི་ཤིན་ཏུ་མང་པོ་ཡོད་རེད།སྨོན་ལམ་ཚུགས་གྲོལ་མ་ཟིན་བར་༸གོང་ས་ལྔ་པ་ཆེན་པོའི་བཅའ་ཡིག་དགོངས་དོན་རྒྱལ་ས་ལྷ་སའི་ཁྲིམས་བདག་འབྲས་ཚོགས་ཆེན་དགེ་བསྐོས་གཉིས་ནས་བྱེད་ཀྱི་ཡོད།སྨོན་ལམ་ཆེན་མོའི་རྗེས་འབྲེལ་གཏོར་རྒྱག་རྟ་པ་དང་།རྐང་དམག་གཟིམ་པ་བཅས་ཀྱི་སྤྱི་ཁྱབ་འགོ་འདོམས་ཤོད་སྐོར་རིམ་སྲས་འཁོར་རེས་ལ་ཐའི་ཇིའི་གདན་ཐོབ་ཡོད་པའི་ཡ་སོར་ཁྲི་པ་གཉིས་ཀྱི་དབང་ཚད་དང་།བྱེད་སྒོའི་སྐོར་༸སྦུག་དམ་རྩ་ཚིགས་རིན་པོ་ཆེ་གསོལ་རས་ཞུས།

༄༅།།བོད་ཟླ་དགུ་པའི་ཚེས་ཉེར་གཉིས་ཉིན་ལྷ་བབས་དུས་ཆེན་ཞེས་སྔོན་སངས་རྒྱས་བཅོམ་ལྡན་འདས་རྒྱ་གར་གྱི་གྲོང་ཁྱེར་གསལ་ལྡན་ནམ།དེང་དུས་སང་ཁ་ས་ཞེས་འབོད་པའི་གནས་སུ་ལྷ་ཡུལ་ནས་ཕྱིར་ཕེབས་པའི་དུས་ཚེས་འཁེལ་ཉིན་གཞུང་གནས་ནས་རྟེན་གཙོ་ཁག་ལ་མཆོད་སྤྲིན་སྣ་ལྔ་སྟོང་ཚར་དང།༸གོང་ས་ཆེན་པོའི་ཐུགས་སྨོན་སྙན་ཤལ།ལྷ་ཁུལ་སེར་སྐྱ་མི་མང་རྣམས་སྔ་དྲོ་རྩེ་ཕོ་བྲང་དང་།སྤྲུལ་པའི་གཙུག་ལག་ཁང་སོགས་སུ་རྣམ་པར་དཀར་བ་བསོད་ནམས་དང་ཡེ་ཤེས་ཀྱི་ཚོགས་གཉིས་ཀྱི་ས་བོན་སྐྲུན་སླད་སྙན་ཤལ་དང་།བརྒྱ་མཆོད།ཕལ་མོ་ཆེ་ནས་མར་ཁུ་ཟོ་ལག།སྤོས།མར་མེའི་མཆོད་ཀོང་སོགས་འཁྱེར་ཏེ་མཆོད་མཇལ་ལ་སོང་ནས་དགོང་དྲོ་རང་རང་སོ་སོའི་ཁྱིམ་དུ་དགའ་རོགས་གྲོགས་མཆེད་མཉམ་བཟའ་འཐུང་གླུ་གཞས་སོགས་ཀྱི་སྤྲོ་སྐྱིད་བཏང་ཡོང།།

༄༅།། བོད་ཟླ་ ༡ ཚེས་ ༢༦ ཉིན་རྫོང་རྒྱབ་ཞར་འཕེན་ཞེས་ལྷ་ཀླུའི་མདུན་ངོས་བཀའ་ཤག་དང་། གཞུང་ཞབས་རྣམས་ཀྱི་དབུ་གུར་གུར་པས་སྔོན་སྒྲོན་སར་བཀའ་བློན་རྣམ་པ་དང་། ཤོད་སྐོར་ཁོངས་གཏོགས་ལས་དཀྱུས་ཡན་ཕེབས་ཏེ་བླ་ཕྱག་ལས་ཁུངས་ནས་རྒྱུ་འགྲོ་བཏང་སྟེ་གསོལ་ཇ། བཞེས་འབྲས། གསོལ་ཚིགས་སོགས་གྲ་སྒྲིག་ཞུས།ཡ་སོར་སྤྱི་ཁྱབ་ངོ་ལས་ནས་རྟ་པ་རྣམས་སྣེ་འཁྲིད་ཀྱིས་ལྷ་ཀླུའི་མདུན་ངོས་བཅར་ཏེ་ཡ་སོར་སྤྱི་ཁྱབ་བགྲེས་པས་གཡས་རུའི་རྟ་གཞུང་བཀའ་བློན་ལྷན་རྒྱས་ཀྱི་གསོལ་ལྕོག་སྟེང་ཕུལ་ཏེ་ཞོལ་ལས་ནང་ཟན་གཅིག་ནས་སྐུ་མདུན་དུ་ཞྭ་ཕུད་སྒུར་ཏེ་བསྡད་པར་བཀའ་བློན་བགྲེས་པས་རྟ་གཞུང་གི་རྟ་པའི་གཏོང་ཁུངས་དང་གྲངས་འབོར་བཀའ་ཁྱབ་གྲུབ་ཉིད་ནང་ཟན་ནས་སྐད་གསང་མཐོན་པོས་དཔེར་ན་གཡས་རུ་དང་པོ་སྡེ་དཔོན་དགའ་བཞི་བའི་གཟབ་འདོན་དང་བཅས་རྟ་པ་༢༥ཞེས་བརྗོད་དེ་རྟ་ཐོག་ནས་མདའ་མེ་མདུང་གསུམ་རྩལ་འགྲན་བཟང་ཞན་གྱིས་བཀའ་ཤག་སྐུ་མདུན་དུ་བསྟར་བསྒྲིགས་མཚམས་བླ་ཕྱག་ནས་ལེགས་དར་གནང་སྟེ་ཕྱག་འབུལ་ཞུས་ཏེ་ཕྱིར་ལོགདེ་ནས་མུ་མཐུད་རྩེད་འགྲན་རྟ་པ་རྣམས་ལ་གོང་བཞིན་གཟེངས་དར་གནང་སྟེ་གཡས་རུའི་རྟ་པ་རྫོགས་མཚམས།བཀའ་བློན་རྣམ་པ་དང། གཞུང་ཞབས་བཅས་གསོལ་ཚིགས་ཟུར་ཡོད་དུ་ཕེབས། བཀའ་བློན་རྣམ་པར་རྩེ་གསོལ་ཐབ་ནས་ཇ་ཞུ་ཕེབས། གསོལ་ཚིགས་གྲུབ་མཚམས་ཡ་སོར་གཞོན་པས་གཡོན་རུའི་གཞུང་ཁྲ་ཕུལ་ཏེ་གོང་བཞིན་གཟེངས་བསྟོད་རེ་སྩལ།དེ་ཉིན་ལྷ་ཞོལ་མི་མང་ཇི་སྙེད་ལྟད་མོ་དང་སྦྲགས་སྤྲོ་སྐྱིད་གཏོང་བར་ཡོང་སྲོལ་དང་། མཛད་སྒོ་གྲུབ་མཚམས་ཡ་སོར་སྤྱི་ཁྱབ་དང་། ངོ་ལས་ནས་བཀའ་བློན་རྣམ་པར་ཕྱག་འབུལ་ཞུས།སྤྱི་ཁྱབ་ངོ་ལས་དང་། རྟ་པ་རྣམས་རྩེ་ཕོ་བྲང་སྐུ་རྒྱབ་མཁར་རྔ་གདོང་བརྒྱུད་སྒར་སར་བསྐྱོད་སྐབས་ལྷ་ཞོལ་མི་མང་ལྟད་མོར་ཇི་སྙེད་ཡོང་།།

༄༅།།བོད་ཟླ་༡༢ཚེས་༢༩ཉིན་རྩེ་དགུ་གཏོར་ཞེས་ཕོ་བྲང་ཤར་རྒྱུད་གཟིམ་ཆུང་དུ་༸གོང་ས་མཆོག་ཞབས་འཁོད་ཀྱིས་དྲུང་བཞེས་ཚུགས།རྩེ་གཟིམ་འགག་ནས་སྨོན་ལམ་སྤྱི་ཁྱབ་སེར་སྐྱ་རྣམས་ལ་བྱེད་སྒོའི་བཀའ་བསྒྱུར་སྩལ།སྲིད་བློན་དང་།བཀའ་ཤག་བཅས་སོ་སོའི་གཟིགས་ཞིབ་རབ་གསལ་དང་།ཤོད་སྐོར་ཛ་ཐའི་སོགས་བདེ་ཡངས་ཤར་གྱི་ལྷོ་ངོས་ཐོག་སྟེང་དུ་གུར་ནང་དང་།རྣམ་གྲྭའི་རོལ་ཆ་བ་རྣམས་བདེ་ཡངས་ཀྱི་བྱང་ངོས་དབུ་གུར་ནང་བཞུགས་ཏེ་ཕན་བདེ་ལེགས་བཤད་གླིང་ཚོགས་ཡོངས་ནས་དགུ་གཏོར་འཆམས་དང་།ལྕགས་མཁར་བསྲེགས་བླུགས་མཛད།དགོང་དྲོ་དགེ་འདུན་ཚོགས་ཡོངས་ནས་ཞོལ་རྡོ་རིང་ཕྱི་མའི་སུམ་མདོར་སོག་ཕུང་ཡོད་སར་ཟོར་འཕེན་གནང་སྐབས་ཟོར་སྣེ་གདན་ཞུར་ཤོད་དྲུང་ལྔ་མཆོད་ཀྱི་ཞབས་གསར་བ་གཉིས་ནས་སྤོས་ཁྲ་འཁྱེར་ཏེ་བཅར་དགོས་ཤིང་།ཟོར་འཕེན་མཚམས་གཟིམ་སྦྱོང་པ་ནས་བོད་མདའ་དགུར་ཤོག་རྒྱག་སྲོལ་བཅས་ཡོདཔ་རེད།།

དེ་ནི་ལྷ་སའི་ཤར་ཕྱོགས་མལ་ལེ་སུམ་ཅུ་ཙམ་གྱི་སར་རི་སྟེང་བྲག་ཡེར་པ་ཞེས་སྔོན་ཆོས་རྒྱལ་སྲོང་བཙན་གྱིས་ཞབས་བཅགས་ཤིང་། དེ་རྗེས་གུ་རུ་རིན་པོ་ཆེ་དང་། ཇོ་བོ་རྗེ་སོགས་ཀྱི་སྒྲུབ་གནས། སྔར་ལྷ་སའི་གཙུག་ལག་ཁང་གསར་བཞེངས་སྐབས་ས་ཕུད་རྡོ་ཕུད་ཀྱིས་བཞེངས་པའི་ལྷ་ཁང་ཡོད་སའི་དགོན་གནས་དེར་བོད་ཟླ་བདུན་པའི་ཚེས་བཅུ་ཉིན་ཚེས་བཅུའི་མཆོད་སྤྲིན་དང་། ཚོགས་འཁོར། སེང་འཆམས་སོགས་འཆམས་སྣེ་འགའ་ཤས་ཀྱི་ལྟད་མོ་ཡོད་པར་ལྷ་ས་བ་སོགས་རང་མོས་ཡོད་པ་རྣམས་མཆོད་འབུལ་དང་སྦྲགས་ལྟད་མོར་འགྲོ་བར་བྱེད།

༄༅།།བོད་ཟླ་༡ཚེས་༡༠ཡར་ངོ་དཔའ་བོ་འདུ་བའི་དུས་ཆེན་ཉིན་རྨེ་རྙིང་དཔེ་ཧར་ལྕོག་ཏུ་གནས་ཆུང་ཆོས་རྒྱལ་ཆེན་པོར་གཞུང་གནས་ནས་ལོ་ལྟར་གཟབ་གསོལ་རྒྱས་པ་བསྟར་འབུལ་གནང་ལམ་གྱི་སྔ་དྲོ་སྨོན་ལམ་ཞོགས་ཚོགས་གྲོལ་འཕྲལ་༸གོང་ས་༸སྐྱབས་མགོན་ཆེན་པོ་ཆིབས་བསྒྱུར་བཀྲིན་ཆེ་སྐབས་སྲིད་བཀས་གཙོས་དྲུང་རིགས་སེར་སྐྱ་ཡོངས་རྫོགས་ན་བཟའ་གཟབ་མཆོར་གྱིས་ཆིབས་ཞབས་སུ་བཅར་སྐབས་གཞུང་བསྟེན་དགྲ་ལྷའི་གཙོ་བོ་འོད་ལྡན་དཀར་པོ་སྐུ་ཕེབས་ཀྱིས་རྨེ་རྙིང་གཟིམ་སྒོའི་འགག་ཏུ་ཕེབས་བསུར་བཅར་ཏེ་༸གོང་ས་༸སྐྱབས་མགོན་ཆེན་པོ་གདན་ཞུས་ཀྱིས་འདུ་ཁང་ནང་དུ་བཞུགས་ཁྲིར་༸ཞབས་སོར་འཁོད་འཕྲལ་ཆོས་རྒྱལ་ཆེན་པོས་རྟེན་གསུམ་མཇལ་དར་ཕུལ།༸གོང་ས་མཆོག་ནས་ཆོས་སྐྱོང་ལ་སྒྲོན་དར་ཡེ་ཤེས་ལྔའི་མདངས་འཛིན་བསྩལ་ཏེ་ཆོས་རྒྱལ་ཆེན་པོ་ཞབས་སྟེགས་ཐོག་འཁོད་འཕྲལ་ཞལ་ཇ་གསེར་ཕུད་བཏེགལུང་ཞུ་སྙན་སྒྲོན་ཞུས།སྲིད་བཀས་གཙོས་དྲུང་རིགས་རྣམས་གོ་རིམ་བཞིན་མཇལ་ཁར་བཅར།ཚོགས་འཁོར་གྱི་ཚིག་མཚམས་སུ་ཆོས་རྒྱལ་ཆེན་པོ་སྐུ་བཞེངས་ཀྱིས་མགུལ་འཆམས་ཐོག་ཕྱག་ཤན་དཔའ་དམ་གྱིས་ཚོགས་ཕུད་གཅོད་གནང་ཟིན་མཚམས་སླར་ཡང་ཞབས་སྟེགས་ཐོག་འཁོད།མཇལ་ཁའི་འཕྲོ་སྩལ་ཚོགས་འཁོར་བཀྱེ་འགྲེམས་ཞུས།ཆོས་སྐྱོང་སྐུ་སངས།གཟབ་གསོལ་མཛད་སྒོ་གྲུབ་འཕྲལ་༸གོང་ས་༸སྐྱབས་མགོན་ཆེན་པོ་མཆོག་ཆིབས་ཞབས་དང་བཅས་བླ་སྟེང་གཟིམ་ཆུང་དུ་ཆིབས་བསྒྱུར་བསྐྱངས།

༄༅།།བོད་ཟླ་ ༥ ཚེས་ ༡༥ ཉིན་རྒྱལ་ས་ལྷ་སར་འཛམ་གླིང་སྤྱི་བསང་ཞེས་གཏོང་སྲོལ། དེ་ནི་ཟླ་བ་ལྔ་པ་སྤྲེལ་ཟླ་འདིར་གུ་རུ་མཚོ་སྐྱེས་རྡོ་རྗེས་བོད་ཀྱི་ལྷ་འདྲེ་ཐམས་ཅད་དམ་ལ་བཏགས་པའི་དུས་མཆོད་ཐུན་མོང་མ་ཡིན་པའི་ཟླ་བ་ཞིག་ཡིན་ཅིང་། དེར་བརྟེན་ཟླ་བ་འདིའི་ཚེས་ ༡༥ གོང་ཡར་ངོའི་དབྱར་གསོལ་ཞེས་ཚེས་ཆ་བཟང་བ་ཞིག་ལ་གཞུང་གནས་ནས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོ་དང་། དགའ་གདོང་ཤིང་བྱ་ཅན་སོགས་གཞུང་བསྟེན་བསྟན་སྲུང་རྣམས་ལ་གཟབ་གསོལ་ལྷ་ཚེས་རྒྱས་པ་དང་འབྲེལ་རྩེའི་སྐུ་ཚབ་མཁན་ཆེ་དང་། ཡིག་ཚང་ནས་སྦུག་དམ་ལུང་ཞུ། སྒྲོན་དར། བཀའ་ཤག་དང་། ཤོད་སྐོར་ཡོངས་རྫོགས་ལྷ་ཚེས་ལ་ཕེབས་ཏེ་ཆོས་སྐྱོང་ཆེན་པོར་སྒྲོན་དར་སྣ་ལྔ་དང་། ཞལ་ཇ་གསེར་ཕུད་སོགས་འབུལ་གནང་གིས་རྒྱལ་བསྟན་ཆབ་སྲིད་སྐོར་བཀའ་ལུང་སྩལ་ཏེ་གཞུང་ཞབས་རྣམས་ཕྱིར་ལོག༸གོང་ས་མཆོག་ནོར་གླིང་དུ་དབྱར་གྱི་རྒྱལ་མོའི་ནམ་ཟླའི་སྤྲོ་བཞེས་སུ་ཕེབས་པས་ཕེབས་སྟོན་ནམ། དབྱར་གསོལ་རྗེས་འབྲེལ་དགའ་སྟོན་གྱི་སླད་རྩེ་གཟིམ་ཆུང་འགག་ཏུ་གཞུང་ཞབས་ཡོངས་རྫོགས་ལ་ཕེབས་སྟོན་ཆབ་ཞུགས་ཉིན་གསུམ་དང་ལས་ཁུངས་སོ་སོ་ནས་རང་ཁོངས་ངོ་ལས་ཚང་མར་སྤྲོ་ཆུང་ཉིན་གསུམ་རེ་བཅས་གཏོང་སྐབས་རྩེ་ཤོད་ཁྱད་མེད་ཀྱི་འབྲེལ་ཡོད་གཞུང་ཞབས་མགྲོན་འབོད་ཞུ་སྲོལ། ཚེས་ ༡༥ ཉིན་སྔ་དྲོ་གཞུང་བསྟེན་དགྲ་ལྷའི་གཙོ་བོ་འོད་ལྡན་དཀར་པོའི་བཀའ་འཁྲོལ་ཐོབ་པའི་ལྷ་ཁུལ་སོགས་ཀྱི་ཆོས་སྐྱོང་སྐུ་ཕེབས་གནང་རྒྱུ་ཡོད་རིགས་ཚང་མ་རང་ཁུངས་ལྷ་མི་ལྷ་བདག་ནས་ལྷ་ཚེས་གཟབ་གསོལ་སྤྱན་འདྲེན་གྱིས་སྒྲོན་དར་དང་། ཞལ་ཇ། ཆང་ཕུད་བཏེགས་པ་སོགས་གྲ་རྒྱས་བྱེད་ཅིང་། དེ་དག་གི་རྗེས་འབྲེལ་དགའ་སྟོན་རྩ་བར་མི་མང་ཡོངས་རྫོགས་ནས་དཔལ་ལྷ་ལྕོག་སོགས་སྤྱི་སྒེར་ལྷ་སྲུང་གི་ལྕོག་མཁར་དང་། གཙང་པོའི་ཆུ་ཁད་བཅས་ལ་བསངས་གསོལ་གཟབ་རྒྱས་དང་འབྲེལ་ལྷ་སའི་གཡས་གཡོན་གླིང་ག་ཁག་ལ་སྤྲོ་སྐྱིད་ཉིན་ལྔ་དྲུག་གཏོང་སྲོལ་ཡོད་པ་རེད།།