སློབ་དཔོན་ཤཱཀྱ་འོད།
༄༅། །སློབ་དཔོན་ཤཱཀྱ་འོད་ནི། ཕྱི་ལོའི་དུས་རབས་བདུན་པ་དང་བརྒྱད་པའི་ནང་རྒྱ་གར་ནུབ་ཕྱོགས་སུ་རྒྱལ་རིགས་སུ་འཁྲུངས། ནཱ་ལནྡཱར་མཁན་པོ་བསོད་ནམས་གྲགས་པ་ལས་རབ་ཏུ་བྱུང་ཞིང་བསྙེན་པར་རྫོགས། མ་གྷ་དྷའི་མཁན་པོ་བསོད་ནམས་གྲགས་པ་དང་སློབ་དཔོན་ཞི་བ་འོད་གཉིས་བསྟེན་ནས་སྡེ་སྣོད་གསུམ་སྦྱངས་པས་འདུལ་བའི་གཞུང་ལུགས་སྨྲ་བའི་ཁྱུ་མཆོག་ཏུ་གྱུར། སློབ་དཔོན་རྡོ་རྗེ་བཞད་པ་ལས་གསང་སྔགས་ཀྱི་གཞུང་རྣམས་གསན་པས་ཤིན་ཏུ་མཁས་པར་གྱུར་ཏེ་པྲ་བྷ་ཧ་ཏི་ཞེས་གྲགས་ཤིང་མཆོག་གི་དངོས་གྲུབ་བརྙེས། ནཱ་ལནྡཱའི་གཙུག་ལག་ཁང་དུ་འདུལ་བའི་བསྟན་བཅོས་སུམ་བརྒྱ་པ་དང་དེའི་རང་འགྲེལ་འོད་ལྡན། དགེ་ཚུལ་ཀ་རི་ཀ་སོགས་ཆོས་ཚན་ལྔ་ལྷག་མཛད་པ་རྣམས་བོད་སྐད་དུའང་བསྒྱུར་ཡོད། ཁ་ཆེའི་ཡུལ་དུ་ཕེབས་ནས་འགྲོ་དོན་རྒྱ་ཆེར་བསྐྱངས། འདུལ་བ་ཤིན་ཏུ་མཁས་པས་དགེ་འདུན་གྱི་སྡེ་སྤེལ་བ་དང་ཚུལ་ཁྲིམས་ཀྱི་བསླབ་པ་ལ་གནས་པའི་སློབ་མ་ཤཱཀྱ་བཤེས་གཉེན་དང་། སློབ་དཔོན་པདྨ་འབྱུང་གནས། ཛི་ན་མི་ཏྲ་སོགས་བསྟན་འགྲོར་མཛད་རྗེས་ཆེ་བའི་སྐྱེས་ཆེན་མང་དུ་འཕེལ། རྗེ་བཙུན་འཇམ་པའི་དབྱངས་ཀྱིས་ཞལ་གཟིགས། འཛམ་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས་ཞེས་བསྔགས་པ་ལས་སློབ་དཔོན་འདི་ཡིས་སངས་རྒྱས་པའི་བསྟན་པའི་ནང་མཛོད་དམ་ཆོས་འདུལ་བའི་གཞུང་ལ་ཐོས་བསམ་སློབ་གཉེར་མཐར་ཕྱིན་གནང་བས་སངས་རྒྱས་བཅོམ་ལྡན་འདས་ཀྱི་སྐུའི་གཡོན་དུ་བཞུགས་པར་འོས་པས་མཆོག་ཅེས་གྲགས། སངས་རྒྱས་ཀྱི་བསྟན་པའི་གཞི་མ་ཚུལ་ཁྲིམས་ལ་བརྩོན་པར་མཛད་བཞིན་དུ་སྐུ་མྱ་ངན་ལས་འདས་པའོ།། །།
གནས་བརྟན་ཀླུའི་སྡེ།
༄༅། །འཕགས་པ་གནས་བརྟན་ཀླུའི་སྡེ་ནི། ཕྱག་གཡས་མཁར་གསིལ། ཕྱག་གཡོན་བུམ་པ་བསྣམས་པ། འཁོར་དགྲ་བཅོམ་པ་སྟོང་དང་ཉིས་བརྒྱ་དང་ལྷན་རྒྱལ་པོའི་ཁབ་ཀྱི་རི་ཆེན་པོ་ཞིག་ལ་བཞུགས། གནས་བརྟན་འདི་རྒྱ་གར་བྱང་ཕྱོགས་སྲེག་མའི་གྲོང་ཁྱེར་ཞེས་བྱ་བའི་རྒྱལ་རིགས་སུ་སྐུ་འཁྲུངས། རྒྱལ་པོའི་བྱ་བ་ལ་ཞུགས་ན་སྡིག་པའི་ལས་མང་པོ་ལ་འཇུག་དགོས་པར་གཟིགས་ཏེ། སངས་རྒྱས་བཅོམ་ལྡན་འདས་དགུང་ལོ་ང་ལྔ་བཞེས་པའི་དུས་སྐུ་མདུན་ནས་བསྙེན་པར་རྫོགས་ཤིང་དགྲ་བཅོམ་ཐོབ། རྒྱལ་ཆེན་བཞིའི་ལྷ་རྣམས་ཀྱིས་རིན་པོ་ཆེའི་གཏེར་གྱི་བུམ་པ་ཕུལ་བ་གདུལ་བྱའི་དོན་དུ་ཕྱག་ཏུ་བསྣམས་པར་གྲགས། གནས་བརྟན་འདི་ལ་གསོལ་བ་བཏབ་ན་སྡིག་པ་སྟོབས་ཆེན་འདག་པ་དང་གདུལ་བྱ་ཆེ་བ་དག་ལ་ཕན་ཡོན་ནམ་བྱིན་རླབས་འབྱུང་།། །།
དཔལ་ལྡན་ཟླ་བ་གྲགས་པ།
༄༅། །དཔལ་ལྡན་ཟླ་བ་གྲགས་པ་ནི། ཕྱི་ལོའི་དུས་རབས་དྲུག་པའི་འགོར་རྒྱ་གར་ལྷོ་ཕྱོགས་ས་མན་ངྷར་(Kerala)ཞེས་པར་ཡབ་བྲམ་ཟེའི་རིགས་སུ་འཁྲུངས། མཚན་མཁན་གྱིས་སངས་རྒྱས་པའི་བསྟན་པ་ལ་ཞུགས་ན་སྐྱེས་བུ་ཆེན་པོར་འགྱུར་ཞེས་ལུང་བསྟན་པ་བཞིན་ཡབ་ཡུམ་གཉིས་ཀྱིས་ནཱ་ལནྡཱར་བཏང་། དེའི་མཁན་པོ་ཟླ་བ་མགོན་པོ་ལས་རབ་ཏུ་བྱུང་བས་ཟླ་བ་གྲགས་པ་ཞེས་གསོལ། རིམ་གྱིས་བསྙེན་པར་རྫོགས། སློབ་དཔོན་ཆོས་སྐྱོང་དང་སློབ་དཔོན་ཟླ་བ་མགོན་པོ་ལས་བཀའ་སྡེ་སྣོད་གསུམ་དང་གསང་སྔགས་རྒྱུད་སྡེ་བཞི་ལ་སྦྱངས་པ་མཐར་སོན་གནང་། སློབ་དཔོན་སངས་རྒྱས་བསྐྱངས་ཀྱི་དངོས་སློབ་ཀ་མ་ལ་བུད་དྷི་ལས་འཕགས་པ་ཀླུ་སྒྲུབ་ཀྱི་དབུ་མའི་གཞུང་ལུགས་མན་ངག་དང་བཅས་པར་སྦྱངས་པ་མཐར་ཕྱིན་པར་མཛད། ཉིན་མཚན་མེད་པར་ཏིང་ངེ་འཛིན་ལ་མཐའ་གཅིག་ཏུ་གཞོལ་བས་རིང་པོར་མ་ཐོགས་པར་རྗེ་བཙུན་འཇམ་དཔལ་དབྱངས་དང་འཕགས་པ་ཀླུ་སྒྲུབ་ཀྱི་ཞལ་ཡང་གཟིགས་ཤིང་གདམས་པ་མང་དུ་གསུངས། དགེ་འདུན་པའི་ཞལ་ཏ་པ་མཛད་སྐབས་རྩིག་པར་བ་མོ་ཞིག་བྲིས་པ་དེ་ཉིད་ལས་འོ་མ་བཞོས་ཏེ་དགེ་འདུན་ལ་བསྙེན་བཀུར་ཞུས། ནཱ་ལནྡཱའི་མཁན་པོ་མཛད་ཅིང་འཕགས་པ་སྤྱན་རས་ཀྱིས་ཞལ་གཟིགས། ཙནྡྲ་གོ་མི་དང་ལོ་བདུན་རིང་རྩོད་པ་གནང་། རྗེ་བཙུན་འཇམ་དཔལ་དབྱངས་དང་སངས་རྒྱས་བསྐྱངས་ཀྱི་སྐུ་སྐྱེར་གྲགས། འཕགས་པ་ཀླུ་སྒྲུབ་ཀྱི་དགོངས་པ་བཞིན་དབུ་མ་འཇུག་པ་རང་འགྲེལ་དང་། དབུ་མ་རྩ་ཤེ་འགྲེལ་པ་ཚིག་གསལ་སོགས་མཛད་ནས་དབུ་མ་ཐལ་འགྱུར་བའི་ཤིང་རྟའི་སྲོལ་ཕྱེ། གཞན་ཡང་གསང་འདུས་རྩ་རྒྱུད་ཀྱི་འགྲེལ་པ་སྒྲོན་གསལ་དང་དབུ་མ་ཚིག་གསལ་གཉིས་ལ་བོད་ཀྱི་མཁས་པས། གནམ་ལ་ཉི་ཟླ་གཉིས། ས་ལ་གསལ་བ་རྣམ་གཉིས་གྲགས་པ་སོགས་ལེགས་བཤད་ཀྱི་བསྟན་བཅོས་ཉི་ཤུ་ལོངས་ཙམ་བརྩམས་པ་རྣམས་བོད་སྐད་དུ་བསྒྱུར་ནས་བོད་ཀྱི་མཁས་པའི་སློབ་གཉེར་གྱི་གཞུང་ཤིག་ཏུ་གྱུར། མཆོག་གི་དངོས་གྲུབ་བརྙེས་ཤིང་དགུང་ལོ་མཐོ་ཙམ་བཞུགས་པའོ།། །།
སངས་རྒྱས་ཤཱཀྱ་ཐུབ་པ།
༄༅། །སངས་རྒྱས་ཤཱཀྱ་ཐུབ་པ་ནི།རྒྱ་གར་འཕགས་པའི་ཡུལ་གྱི་སེར་སྐྱའི་ཡུལ་དུ་སྐུ་འཁྲུངས། རིགས་རྒྱལ་རིགས། གདུང་གཽ་ཏ་མ། འོད་འདོམ་གང་། ཡབ་ཟས་གཙང་མ། ཡུམ་སྒྱུ་འཕྲུལ་མ། སྲས་སྒྲ་གཅན་འཛིན། རིམ་གྲོ་པ་ཀུན་དགའ་བོ། ཤེས་རབ་ཅན་གྱི་མཆོག་ཉེ་རྒྱལ། རྫུ་འཕྲུལ་ཅན་གྱི་མཆོག་པང་ནས་སྐྱེས། འདུས་པ་དང་པོ་ལ་དགེ་སློང་སྟོང་ཉིས་བརྒྱ་ལྔ་བཅུ། སྐུ་ཚེ་ལོ་བརྒྱད་ཅུ། དམ་པའི་ཆོས་ལོ་བརྒྱ་ཕྲག་བཅུ། སྐུ་གདུང་ནི་རྒྱས་བཞིན་པ་སྟེ་ད་ལྟར་གྱི་སངས་རྒྱས་ཐམས་ཅད་འདིས་མཚོན་དགོས་པའོ།། །།
མར་མི་དྭགས་གསུམ།
༡། བོད་གངས་ཅན་ལྗོངས་ཀྱི་བཀའ་བརྒྱུད་པའི་བསྟན་པའི་སྲོལ་འབྱེད་སྒྲ་སྒྱུར་མར་པ་ལོ་ཙཱ་བ། ༢། སྒྲ་སྒྱུར་མར་པའི་ཐུགས་སྲས་རྗེ་བཙུན་མི་ལ་རས་པ། ༣། མཉམ་མེད་དྭགས་པོ་ལྷ་རྗེ་བཅས་བཀའ་བརྒྱུད་པའི་བསྟན་པའི་སྲོལ་འབྱེད་དམ་སྲོལ་འཛིན་རྣམ་གསུམ་གཙོ་བོ་ཡིན་པས་དེ་དག་གི་མཚན་བསྡུས་པ་ལ་མར་མི་དྭགས་གསུམ་ཟེར།
སྟོན་པ་གཤེན་རབ་མི་བོའི་རྣམ་ཐར།
༄༅།།སྟོན་པ་གཤེན་རབ་མི་བོ་ཕྱི་ལོའི་སྔོན་གྱི་ལོ་༡༦༠༡༧ཙམ་ལ་བོད་ཡུལ་གངས་རི་ཏེ་སེའི་ཉེ་འགྲམ་དུ་ཡབ་ཞང་ཞུང་གི་རྒྱལ་པོ་རྒྱ་བོན་ཐོད་དཀར་དང་། ཡུམ་བྱམས་མ་རྣམ་སྤྲུལ་ཡུམ་ཆེན་རྒྱལ་བཞེད་མ་གཉིས་ཀྱི་སྲས་སུ་སྐུ་བལྟམས། ཡབ་རྒྱ་བོན་ཐོད་དཀར་གྱིས་མཚན་མཁན་བྲམ་ཟེ་གདན་དྲངས་ནས་བརྟག་པར་གཞན་དང་མི་འདྲ་བ་སྤྲུལ་པའི་སྐུ་རུ་གསུངས་ཏེ།སྟོན་པ་གཤེན་རབ་མི་བོ་ཞེས་མཚན་གསོལ། གཤེན་ནི་རིགས་རུས། རབ་ནི་མཆོག་གམ་མགོན་དུ་གྱུར་པ། མི་བོ་ནི་རླབས་ཆེ་བའི་མི་སྟེ། དམུ་རུས་གཤེན་ལས་འཁྲུངས་པའི་སྟོན་པ་བླ་ན་མེད་པའམ་སངས་རྒྱས་སམ་རླབས་ཆེན་གྱི་མི་སྣ་ལ་གོསྐུ་ན་ཕྲ་དུས་ནས་ཡབ་ཀྱི་རྒྱལ་ས་བཟུང་བས་ཞང་ཞུང་རྒྱལ་པོ་ཞེས་གྲགས། སྔོན་རྒྱལ་ཁབ་བཅུའི་སྲས་མོ་ཁབ་ཏུ་བཞེས་ཚུལ་མཛད་དེ། སྲས་བརྒྱད་དང་། སྲས་མོ་གཉིས་བཅས་རིགས་སྲས་བཅུ་འཁྲུངས། དགུང་ལོ་སོ་གཅིག་བར་ཞང་ཞུང་རྒྱལ་ཁབ་ཆེ་ཆུང་ཐམས་ཅད་(ཕྱིས་རྒྱལ་ཁབ་བཅོ་བརྒྱད་དུ་གྲགས།)དབང་དུ་བསྒྱུར་ཏེ་ལས་རྒྱུ་འབྲས་ཀྱི་བོན་ལ་བརྟེན་ནས་རྒྱལ་སྲིད་བསྐྱངས་པར་མཛད། སྒྲ་ཚད་བཟོ་གསོ་ལ་སོགས་པའི་རིག་པའི་གནས་ལྔ་ཐེག་པ་རིམ་དགུ་བཅས་ཀྱི་སྲོལ་གཏོད་ནས་སངས་རྒྱས་གཡུང་དྲུང་བོན་གྱི་བསྟན་པ་སྤེལ། དགུང་ལོ་སོ་གཅིག་པར་ཉིད་ཀྱི་དབུ་སྐྲ་ཉིད་ཀྱིས་བསིལ་ནས་རབ་ཏུ་བྱུང་ནས་འདུལ་ཁྲིམས་ཀྱི་སྡོམ་པ་བསྲུང་། ལོ་དགུའི་རིང་དཀའ་སྤྱད་གནང་། བོན་སྒོ་བཞི་མཛོད་ལྔ་དང་། ཕྱི་འདུལ་བ་མདོ། ནང་གསང་བ་སྔགས། གསང་བ་རྫོགས་པ་ཆེན་པོའི་བོན་བཅས་ཐར་པ་དོན་དུ་གཉེར་བའི་མཐའ་ཀླས་སྐྱེ་དགུའི་དོན་གསུངས་པར་མཛད་ནས་མཁའ་ཁྱབ་འགྲོ་དྲུག་སེམས་ཅན་ཐམས་ཅད་བདེ་བའི་ལམ་དུ་འདྲེན་པ་མཛད་པའོ།། །།
དགེ་སློང་མ་དཔལ་མོའི་ལུགས་ཀྱི་ཐུགས་རྗེ་ཆེན་པོ་བཅུ་གཅིག་ཞལ།
༄༅། །ཐུགས་རྗེ་ཆེན་པོ་སྐུ་མདོག་དཀར་པོ་ཞལ་བཅུ་གཅིག་ཡོད་པ་ལ་རྩ་ཞལ་ལམ་དབུས་ཞལ་དཀར་པོ། གཡས་ཞལ་ལྗང་ཁུ། གཡོན་ཞལ་དམར་པོ། དེའི་སྟེང་གི་དབུས་ཞལ་ལྗང་ཁུ། གཡས་ཞལ་དཀར་པོ། གཡོན་ཞལ་དམར་པོ། དེའི་སྟེང་གི་དབུས་ཞལ་དམར་པོ། གཡས་ཞལ་ལྗང་ཁུ། གཡོན་ཞལ་དཀར་པོ། དེ་དག་རྣམས་འཛུམ་པའི་ཞལ་ཅན། དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་པ། སྤྱན་གསུམ་དང་ལྡན་པ། རལ་པ་དམར་སེར་གྱེན་དུ་བསྒྲེངས། དེའི་སྤྱི་བོར་ཞི་ཞལ་དམར་པོ་གཙུག་ཏོར་དང་བཅས་ཤིང་རྒྱན་མེད་པ། མགུལ་བ་ཡན་ཆད་ཕྱུང་བ། ཚངས་པར་སྤྱོད་པའི་ཆ་ལུགས་འཛིན་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ། གཡས་ཀྱི་གཉིས་པས་བགྲང་ཕྲེང་། གསུམ་པས་མཆོག་སྦྱིན་གྱི་ཕྱག་རྒྱ། བཞི་པས་འཁོར་ལོ་འཛིན་པ། གཡོན་གྱི་གཉིས་པས་གསེར་གྱི་པདྨ། གསུམ་པས་རིལ་བ་སྤྱི་བླུགས། བཞི་པས་མདའ་གཞུ་འཛིན་པ། ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་ཀྱིས་མཆོད་སྦྱིན་མཛད་པ། ཕྱག་ཐམས་ཅད་ཀྱི་མཐིལ་དུ་སྤྱན་རེ་རེ་ཡོད་པ། པདྨ་དང་ཟླ་བའི་གདན་ལ་ཞབས་གཉིས་རྡོ་རྗེ་སྐྱིལ་ཀྲུང་ངམ་མཉམ་པའི་སྟབས་ཀྱིས་བཞེངས་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། རས་བཟང་པོས་སྐུ་སྨད་གཡོགས་ཤིང་། རི་དྭགས་ཀྱི་པགས་པས་ནུ་མ་གཡོན་བཀབ་པ། རལ་པ་དམར་སེར་འཁྲུགས་པ། ཆོས་ཐམས་ཅད་ཀྱི་རྩ་བ་སྙིང་རྗེ་ཡིན་ལ། དེ་མཐར་ཕྱིན་པའི་འབྲས་བུ་འཕགས་པ་སྤྱན་རས་གཟིགས་ཀྱི་ཆོས་གཟུགས་ཀྱི་སྐུ་འདི་ཡིན། རྒྱལ་བ་ཐམས་ཅད་ཀྱི་ཐུགས་བརྩེ་བ་སྙིང་རྗེ་ཆེན་པོ་ཚུལ་ཇི་ལྟར་སྒྲུབ་ཚུལ་སྟོན་པ་ལྷ་ཡི་རྣམ་པར་ཤར་བ་ཡིན་པས།ལྷ་འདི་བསྟེན་ན་རང་རྒྱུད་ལ་སྙིང་རྗེ་འཕེལ་ཞིང་ནད་གདོན་འབྱུང་པོ་ཐམས་ཅད་ཀྱི་གནོད་པ་ཞི་ཞིང་སྐྱེ་བ་ནས་རྗེས་སུ་འཛིན་པའི་ཐུགས་རྗེ་དང་མཐུ་སྟོབས་རྨད་དུ་བྱུང་བ་མངའ་ཞིང་། བོད་དུ་དགེ་སློང་དཔལ་མོ་དང་བལ་པོ་པེ་ཉ་བ་ལས་བརྒྱུད་པ་སོགས་ཡོད་པ་མ་ཟད་ཐུགས་རྗེ་ཆེན་པོ་འདིའི་ཆོས་སྐོར་ཤིན་ཏུ་མང་བའོ།། །། བཏུས་པའི་ཁུངས། ༡༽ རྩོམ་སྒྲིག་པ་འགྱུར་མེད་ཆོས་ཀྱི་རྡོ་རྗེ། བོད་བརྒྱུད་ནང་བསྟན་ལྷ་ཚོགས་ཆེན་མོ། ཕྱི་ལོ་༢༠༠༡མཚོ་སྔོན་མི་རིགས་དཔེ་སྐྲུན་ཁང་། ཤོག་གྲངས་༤༤༨ནས་༤༤༩བར་གསལ། ༢༽ རྩོམ་པ་པོ་མཁན་མངའ་རིས་པ་ཚེ་དབང་རིག་འཛིན། ལྷག་པའི་ལྷ་རྣམས་ཀྱི་ཞལ་ཐང་འབྲི་ཐབས་ཀུན་བཟང་རྣམ་པར་རོལ་པའི་ཕྱག་རྒྱ། ཕྱི་ལོ་༢༠༠༥སྨིན་གླིང་རྩོམ་སྒྲིག་ལྷན་ཚོགས་སྐབས་གསུམ་པ་ནས་འདོན་སྤེལ་ཞུས། ཤོག་གྲངས་༢༧ན་གསལ། ༣༽ སྨོན་ལམ་ཚིག་མཛོད་ཆེན་མོ།
སྟོན་པ་གཙོ་འཁོར་གསུམ།
༡། ནང་པ་སངས་རྒྱས་པའི་བསྟན་པའི་སྲོལ་འབྱེད་དམ་བསྟན་པའི་བདག་པོ་ཡིན་པའི་སྟོན་པ་ཤཱཀྱ་ཐུབ་པ། ༢། སྟོན་པ་ཞལ་བཞུགས་པའི་དུས་ཤེས་རབ་ཅན་གྱི་མཆོག་ཏུ་གྱུར་པ་ཤཱ་རིའི་བུ། ༣། རྫུ་འཕྲུལ་ཅན་གྱི་མཆོག་ཏུ་གྱུར་པ་མོའུ་འགལ་གྱི་བུ་གསུམ་ལ་སྟོན་པ་གཙོ་འཁོར་གསུམ་ཟེར།
ས་སྐྱའི་ལུགས་ཀྱི་སེང་གདོང་མ་དམར་མོ།
༄༅། །ཡེ་ཤེས་ཀྱི་མཁའ་འགྲོ་མ་སེངྒེའི་གདོང་པ་ཅན་སྐུ་མདོག་དམར་མོ་ནི།ཞལ་གཅིག་ཕྱག་གཉིས་པ། གཡས་གྲི་གུག་གསེར་མདོག་ནམ་མཁའ་ལ་འཕྱར་བ། གཡོན་ཐོད་ཁྲག་ཐུགས་ཀར་འཛིན་པ། གྲུ་མོ་ན་ཁ་ཊྭཱཾ་ག་དང་བཅས་པ། སྤྱན་གསུམ་པ། སྐྲ་སེར་གྱེན་དུ་བརྫེས་པ། ཐོད་སྐམ་ལྔས་དབུ་རྒྱན་དང་རློན་པ་ལྔ་བཅུའི་དོ་ཤལ་བྱས་པ། སྟག་གི་པགས་པའི་ཤམ་ཐབས་དང་། ཕྱག་རྒྱ་ལྔས་བརྒྱན་པ། པད་ཉི་ལ་རུ་ཊ་ཕོ་མོ་གན་རྐྱལ་དུ་བསྣོལ་བའི་སྟེང་དུ་ཞབས་གཡས་བསྐུམས་གཡོན་བརྐྱངས་པས་ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་བཞུགས་པ། ཡེ་ཤེས་ཀྱི་མཁའ་འགྲོ་མ་འདི་ཉིད་ཀྱིས་ལས་བཞིའི་འཕྲིན་ལས་ཀྱི་སྒོ་ནས་མཆོག་དང་ཐུན་མོང་གི་དངོས་གྲུབ་སྩོལ་བ་ལ་བྱིན་རླབས་གཞན་ལས་ཆེས་ཁྱད་པར་དུ་འཕགས་པ་དང་། མི་དང་མི་མ་ཡིན་པའི་བྱད་ཁ་རྦོད་གཏོང་སོགས་བཟློག་པ་ལ་མཆོག་ཏུ་བསྔགས་པས། བོད་དུ་སེང་གདོང་བཟློག་སྟོང་དང་སེང་གདོང་དྲག་འདུལ་ལ་སོགས་པའི་ཆོ་ག་མང་དུ་ཡོད་པའོ།། །། བཏུས་པའི་ཁུངས། ༡༽ རྩོམ་སྒྲིག་པ་འགྱུར་མེད་ཆོས་ཀྱི་རྡོ་རྗེ། བོད་བརྒྱུད་ནང་བསྟན་ལྷ་ཚོགས་ཆེན་མོ། ཕྱི་ལོ་༢༠༠༡མཚོ་སྔོན་མི་རིགས་དཔེ་སྐྲུན་ཁང་། ཤོག་གྲངས་༧༢༣ནས་༧༢༤བར་གསལ།