༄༅། །བཙུན་དགོན་ཞེ་ཆེན་ཨོ་རྒྱན་ཆོས་རྫོང་ནི། ཞྭ་ལམ་རབ་འབྱམས་པ་སྐུ་ཕྲེང་དང་པོ་བསྟན་པའི་རྒྱལ་མཚན་མཆོག་གིས་ཕྱི་ལོ་ ༡༦༩༨ ལོར་ཁམས་སྡེ་དགེའི་ནང་དུ་ཕྱག་བཏབ། གད་ཡག་བླ་མ་པདྨ་རྒྱལ་མཚན་སོགས་སློབ་ཆེན་བརྒྱད་དང་དོན་གཉིས་སྒྲུབ་ནུས་པའི་བརྒྱུད་འཛིན་ཉེར་ལྔ་སོགས་ལ་བསྟན་པ་གཏད། རབ་འབྱམས་པ་སྐུ་ཕྲེང་གཉིས་པ་རིག་འཛིན་དཔལ་འབྱོར་རྒྱ་མཚོས་གདན་ས་དེ་དང་ཉེ་བར་གནས་སྤོས་ཀྱིས་ཞེ་ཆེན་བསྟན་གཉིས་དར་རྒྱས་གླིང་ཞེས་མཚན་ཐོགས་ཤིང་། ཐོག་མའི་གདན་ས་དེ་རིམ་བཞིན་བཙུན་དགོན་དུ་གྱུར་པ་ཞིག་ཡིན། བོད་དུ་དུས་འགྱུར་བྱུང་བའི་རྗེས་༸སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ་མཆོག་གིས་རིན་ཆེན་གཏེར་མཛོད་ཀྱི་བཀའ་དབང་དང་པོ་སྩལ་སྐབས་དད་ལྡན་འབྲུག་གི་ཁྲིམས་དཔོན་ཟུར་པ་དགའ་འཛོམས་ཞེས་པས་ས་ཆ་ཞིག་ཕུལ་བར་བརྟེན་ཕྱི་ལོ་ ༡༩༧༡ ལོར་འབྲུག་ཐིམ་ཕུའི་རྫོང་ཁོངས་སུ་བཙུན་དགོན་འདི་གསར་བཞེངས་མཛད། དེང་སྐབས་དིལ་མགོ་མཁྱེན་བརྩེ་རིན་པོ་ཆེའི་ཡང་སྲིད་དང་ཞེ་ཆེན་རབ་འབྱམས་རིན་པོ་ཆེ་རྣམ་གཉིས་ཀྱིས་གཟིགས་སྐྱོང་འོག་བོད་དང་འབྲུག་པའི་བཙུན་མ་ཞལ་གྲངས་ ༨༠ ཙམ་གྱིས་བཤད་སྒྲུབ་བསྟན་པ་ཉམས་མེད་རྒྱུན་འཛིན་གནང་བཞིན་ཡོད།། །།