༄༅། །གཏེར་སྒར་འོད་གསལ་གླིང་ནི། ༸སྐྱབས་རྗེ་དམ་པ་ཞི་བར་གཤེགས་པ་སྤྲུལ་སྐུ་ཨོ་རྒྱན་རིན་པོ་ཆེ་མཆོག་གིས་བལ་ཡུལ་འཕགས་པ་ཤིང་ཀུན་གྱི་ཉེ་འགྲམ་དུ་ཕྱག་བཏབ་སྟེ། ངེས་དོན་འོད་གསལ་གླིང་ཞེས་མཚན་གསོལ། ཕྱིས་སུ་སྲས་གྲུབ་དབང་ཚོགས་གཉིས་རིན་པོ་ཆེ་དང་ཡོངས་དགེ་མི་འགྱུར་རིན་པོ་ཆེ་རྣམ་པ་གཉིས་ཀྱིས་གཟིགས་རྟོག་མཛད་དེ་ཕྱི་ནང་གི་རྟེན་དང་བརྟེན་པ་བཅས་ལེགས་པར་གྲུབ། ཕྱི་ལོ་༢༠༡༠ལོའི་བར་དུ་༸སྐྱབས་རྗེ་གྲུབ་དབང་ཚོགས་གཉིས་རིན་པོ་ཆེས་ཐུགས་འགན་གཙོར་བཞེས་གནང་། ཕྱིས་སུ་༸སྐྱབས་རྗེ་ཡོངས་དགེ་མི་འགྱུར་རིན་པོ་ཆེས་གཙོ་འགན་བཞེས་རྗེས་དགོན་པར་གཏེར་སྒར་ཞེས་མཚན་གསོལ་དགོས་པའི་བཀའ་མངགས་ཡང་ནས་ཡང་དུ་གནང་བ་ལྟར།༸སྐྱབས་རྗེ་ཡོངས་དགེ་མི་འགྱུར་རིན་པོ་ཆེ་མཆོག་གིས་གཏེར་སྒར་ངེས་དོན་ལུང་རིགས་འོད་གསལ་དར་རྒྱས་གླིང་ཞེས་པའི་མཚན་བཏགས་ནས་སྒོ་འབྱེད་གནང་། ཕྱི་ལོ་༢༠༡༠ཟླ་༢ནང་གཞུང་ལུགས་འཆད་ཉན་གྱི་སློབ་ཚན་དབུ་བཙུགས་ཏེ།ད་ལྟའི་ཆར་གྲྭ་པ་༢༣༦དང་།བཙུན་མ་༤ཡོད་པ་དེ་དག་གིས་གཞི་རིམ་ནས་ལོ་རིམ་བཅུ་གསུམ་བར་བརྡ་དག་སྙན་གསུམ་དང་། བསྡུས་རྟགས་བློ་གསུམ་ནས་བཟུང་མདོ་སྔགས་གཞུང་ལུགས་དང་བཅས་པར་ཐོས་བསམ་སྒོམ་གསུམ་ཡ་མ་བྲལ་བར་འཆད་རྩོད་རྩོམ་གསུམ་གྱིས་ལུང་རིགས་བརྡར་ཤ་གཅོད་སའི་ཆོས་སྡེ་ཞིག་ཏུ་གྱུར། ཉམས་བཞེས་གཙོ་བོ་ཀརྨ་ཀཾ་ཚང་གི་རང་ལུགས་གཞིར་བཞག་སྟེ་ཡོངས་དགེའི་གཏེར་ཆོས་རྣམས་གཙོར་འདོན་མཛད་ཀྱི་ཡོད་པ་མ་ཟད། མཆོག་གླིང་གཏེར་གསར་གྱིས་ཟུར་བརྒྱན་ཏེ་བཀའ་བརྒྱུད་པའི་མདོ་སྔགས་གཞུང་ཆེན་བརྒྱད་གཙོ་བོར་གྱུར་པའི་ཀུན་མཁྱེན་རྣམ་གསུམ་གྱི་གཞུང་ལུགས་ལ་ཡང་ཐོས་བསམ་སྒོམ་གསུམ་དང་། ཕྱག་ཆེན་སྔོན་འགྲོ་ནས་ཞི་ལྷག་ཟུང་འབྲེལ་གྱི་ཉམས་ལེན་ཚུལ་བཞིན་གནང་རྒྱུ་སོགས་བཤད་སྒྲུབ་ལས་གསུམ་གྱི་བྱ་བར་བརྩོན་བཞིན་ཡོད།། །།